வட, கிழக்கில் வெறுமையாக இருக்கும் நிலங்களில் சிங்களக் குடியேற்றங்கள் இடம்பெறும் ஆபத்து

தமிழர்கள் புலம் பெயர்ந்து செல்லும் நிலைமை அதிகரித்து செல்வதால் இனத்தின் அளவு குறைந்து செல்கிறது. நிலம் வெறுமையாக இருப்பது அதிகரித்து செல்வது ஆபத்தானது. வடக்கு, கிழக்கில் நிலங்கள் வெறுமையாக உள்ளமை சிங்கள குடியேற்றங்களை உள் இழுப்பதற்கு வழி கோலுகிறது. என முன்னாள் எம்பி. மு. சந்திரகுமார் தெரிவித்துள்ளார்.

- வடமாராட்சி நிருபர்

நேற்று முன்தினம் யாழ்ப்பாணம் தந்தை செல்வா நினைவரங்கில் 1983 கருப்பு ஜூலையில் வெலிக்கடை சிறையில் படுகொலை செய்யப்பட்டவர்களின் நினைவு நிகழ்வில் கலந்துகொண்டு உரையாற்றும் போதே அவர் இவ்வாறு தெரிவித்துள்ளார். அங்கு அவர் மேலும் தெரிவிக்கையில்,

1983 ஜூலை தமிழர்கள் மீது கட்டவிழ்த்து விடப்பட்ட இன அழிப்பு நாள். அதற்கு முன்னரும் இந்த நாட்டில் தமிழர்கள் இரண்டாம் தர பிரஜைகளாக நடத்தப்பட்டு ஒடுக்கப்பட வேண்டும் என்ற சிந்தனையில்தான் ஆட்சியில் இருந்தார்கள். ஆனால் அதற்கு செயல்வடிவம் கொடுத்தவர் ஜே. ஆர். ஜெயவர்தன தான். அண்மையில் புகையிரதத்தில் ஒரு குழு சகோதரத்துவ கோசத்துடன் வந்தனர். இதனை பார்த்த எனக்கு இப்பவும் நினைவில் வருகிறது.

அன்று புகையிரதத்தில் வந்த சிறில் மத்தியூவின் காடையர்கள் குழு யாழ். நகரை அழித்தது. அன்று ஜே. ஆர். தமிழர்களுக்கு எதிராக வன்முறைகளை மேற்கொண்டவர்கள் ஜே. வி. பியினர்தான் என்று சொன்னார். அன்று இருந்த அதே நிலைப்பாட்டில்தான் இன்றைய ஆட்சியாளர்கள் உள்ளனர்.

1983 க்கு பின்னர்தான் தமிழ் இளைஞர்கள் மத்தியில் சிங்கள பேரினவாதத்துக்கு எதிராகவும், அதன் இராணுவத்துக்கு எதிராகவும் போராட வேண்டும் என்ற உத்வேகம் அதிகரித்தது. வடக்கு, கிழக்கு தமிழர்களின் தாயகம். அங்குதான் அவர்களுக்கு பாதுகாப்பு என உணர்த்தியதும் 1983 தான்.