Mylpaal by Taalpaal gevier

Die feesvieringe om Afrikaans se 100 jaar as amptelike taal te gedenk, is die afgelope naweek by die Afrikaanse Taalmonument in die Paarl afgesluit.

- Chantelle Hartebeest

Suid-Afrikaners oor die land heen het vanjaar die mylpaal van Afrikaans met verskeie saamtrekke gevier.

Die Solidariteit-beweging het vroeër vanjaar reuseletters wat Afrikaans uitspel en kunstig versier is, op 'n vragmotor gelaai en van Pretoria tot in die Paarl ter viering van dié mylpaal gereis.

Carien Bloem, die hoof van onderwysprojekte by AfriForum en projekleier van die Afrikaans Amptelik 100-lettertoer, het destyds aan Gazette se susterskoerant, Paarl Post, gesê hulle wou graag as 'n organisasie wat in die noorde van die land is, deel van die feesvieringe in die suide wees.