Drinkwaterkrisis in Witsand

WITSAND - Skok en groot kommer heers onder inwoners nadat onafhanklike watermonsters ernstige bakteriële besoedeling in plaaslike drinkwater bevestig het.

- Ben Snyman

Met gesondheidsklagtes wat reeds aangemeld word en waarskuwings dat die water nie veilig vir gebruik is nie, neem die druk op die Hessequa-munisipaliteit toe om dringend op te tree en duidelike antwoorde te verskaf.Volgens 'n mediaverklaring deur die VF Plus het 'n Sanas-geakkrediteerde verslag, gedateer 20 April, bevestig dat bakterieë soos Escherichia coli (E. Coli), enterokokke en totale koliforme by verskeie punte in die Witsand-gebied aangetref is. Hierdie bevindings dui op ernstige fekale besoedeling en 'n onmiddellike risiko vir mens en dier.

Die verslag toon verder dat die vrye chloor-residuvlakke by alle toetspunte onder die minimum vereiste vlak was, wat dui op onvoldoende ontsmetting van drinkwater.

Daar word ook beweer dat die chloor-toedieningstoestel wat die gebied bedien, moontlik nie ten volle funksioneel is nie, wat beteken dat inwoners vir 'n onbepaalde tydperk water kon ontvang het wat nie behoorlik behandel is nie.