વિજયની સિક્સર સાથે ભારત વર્લ્ડ કપની સેમીફાઇનલમાં લગભગ નિશ્ચિત

રોહિતની બેટિંગ બાદ શમી-બુમરાહ ઝળક્યા, ઇંગ્લેન્ડને 100 રનથી આસાનીથી હરાવ્યું વર્તમાન વર્લ્ડ કપમાં ભારત અજેય રહ્યું, 12 પોઇન્ટ સાથે ભારત મોખરે

- 

મેન ઓફ ધ મેચ રોહિત શર્માની મક્કમ અડધી સદી છતાં ભારતીય ટીમ જંગી સ્કોર ખડકવામાં નિષ્ફળ રહી ત્યારે મોહમ્મદ શમી અને જસપ્રિત બુમરાહ જેવા બોલર ટીમની મદદે આવ્યા અને આઇસીસી વન-ડે ક્રિકેટમાં રવિવારે ભારતે તેનો દબદબો જાળવી રાખીને ઇંગ્લેન્ડને 100 રનથી હરાવવાની સાથે સેમિફાઇનલમાં પોતાનો પ્રવેશ લગભગ નિશ્ચિત કરી દીધો હતો. ભારત હાલમાં પોઇન્ટ ટેબલમાં મોખરે છે અને અન્ય મેચોમાં કોઈ મોટી ઉથલપાથલ થાય નહીં તો આ તબક્કે ભારત સેમિફાઇનલમાં પ્રવેશી જશે.

અહીં રમાયેલી મેચમાં ભારત એક તબક્કે બેટિંગમાં નબળું પડેલું જણાતું હતું પરંતુ વર્તમાન ટુર્નામેન્ટમાં પહેલી વાર ટારગેટ ડિફેન્ડ કરનારી ભારતીય ટીમના બોલર્સે રંગ રાખ્યો હતો અને 230 રનના સ્કોરને સફળતાપૂર્વક ડિફેન્ડ કરીને ઇંગ્લેન્ડને મહાત આપી હતી.