Eden ryg 16 medaljes in by SA's

Eden het sy status as een van Suid-Afrika se voorste toutrekstreke bevestig met 'n indrukwekkende vertoning by die pas afgelope SA toutrekkampioenskappe in Hartenbos.

- Hugo Redelinghuys

Eden se mans-, vroueen juniors, waaronder verskeie hoërskoolatlete, het 16 medaljes in die Premierliga sowel as die Presidentsliga ingepalm.

Altesaam 429 atlete van 145 spanne, wat sewe streke verteenwoordig, was hier in aksie. Dis die 54ste keer wat die SA nasionale kampioenskappe aangebied is.

Dirk Kotzé, burgemeester van Mosselbaai, het in sy verwelkoming aan die deelnemers, beamptes en toeskouers gesê die SA's bring die land se beste spanne byeen om die krag, eenheid en die ware gees van mededinging te vier. Die prestasies wat Suid-Afrika se bestes hier gaan optower, sal voortbou op Mosselbaai se trotse kultuur van sportuitnemendheid - 'n nalatenskap van harde werk en toewyding.