மரபையும் புதுமையையும் இணைத்தவர் வைரமுத்து

முதல்வர் மு.க.ஸ்டாலின் புகழாரம்

- 

சென்னை, மார்ச் 16: 'தமிழின் மரபையும் புதுமையையும் இணைத்தவர் கவிஞர் வைரமுத்து' என முதல்வர் மு.க.ஸ்டாலின் புகழாரம் சூட்டினார்.

கவிஞர் வைரமுத்து கல்வி அறக்கட்டளை சார்பில் 'வைரமுத்தியம்' எனும் கவிஞர் வைரமுத்துவின் படைப்பிலக்கிய பன்னாட்டுக் கருத்தரங்கம் சென்னை எம்ஆர்சி நகரில் உள்ள தனியார் ஹோட்டலில் ஞாயிற்றுக்கிழமை நடைபெற்றது.

இதை உச்சநீதிமன்ற நீதிபதி அரங்க. மகாதேவன் தொடங்கி வைத்தார். தொடர்ந்து, கவிதை, நாவல், கட்டுரை, பாடல் என்னும் தலைப்புகளில் 22 தமிழ் அறிஞர்கள் ஆய்வுரை நிகழ்த்தினர்.

இதனிடையே, கவிஞர் வைரமுத்து எழுதிய மகாகவிதை எனும் நூலின் ஆங்கில பதிப்பை முன்னாள் மத்திய அமைச்சர் ப.சிதம்பரம் வெளியிட, மலேசிய நாட்டின் முன்னாள் அமைச்சர் டத்தோ எம்.சரவணன் முதல் பிரதியை பெற்றுக்கொண்டார்.

கருத்தரங்கின் நிறைவு நிகழ்வில் கலந்து கொண்ட முதல்வர் மு.க.ஸ்டாலின் 'வைரமுத்தியம்' கருத்தரங்கின் கட்டுரை நூலை வெளியிட, நாடாளுமன்ற உறுப்பினரும் பாரத் பல்கலை. வேந்தருமான எஸ்.ஜெகத்ரட்சகன் முதல் படியை பெற்றுக்கொண்டார்.