கூட்ட நெரிசல் மேலாண்மை மசோதா: கர்நாடக பேரவையில் தாக்கல்

கூட்டு அவைக் குழு பரிசீலனைக்கு அனுப்பி வைப்பு

- 

பெங்களூரு, ஆக. 21: கர்நாடக சட்டப் பேரவையில் அறிமுகப்படுத்தப்பட்ட கூட்ட நெரிசல் மேலாண்மை சட்ட மசோதா, அரசியல் கட்சிகளின் கூட்டங்களுக்கு நெருக்கடி ஏற்படுத்துவதாக உள்ளது எனக் கூறி எதிர்க்கட்சிகள் எதிர்ப்பு தெரிவித்தன.

பெங்களூரில் ஜூன் 4ஆம் தேதி நடைபெற்ற ஆர்.சி.பி. அணியின் ஐபிஎல் கிரிக்கெட் கோப்பை வெற்றிக் கொண்டாட்டத்தின் போது ஏற்பட்ட கூட்ட நெரிசலில் சிக்கி 11 பேர் உயிரிழந்தனர். இந்த சம்பவம் கர்நாடகத்தில் மட்டுமல்லாமல், இந்தியா முழுவதும் பெரும் அதிர்வு அலைகளை ஏற்படுத்தியது.

நெரிசலை நிர்வகிக்க தனிச் சட்ட மசோதாவை தாக்கல் செய்ய மாநில அரசு யோசித்து வந்தது. இந்த நிலையில், கர்நாடக கூட்ட நெரிசல் கட்டுப்பாட்டு (நிகழ்ச்சிகள் மற்றும் மக்கள் கூடும் இடங்களில் கூட்டத்தை நிர்வகித்தல்) சட்ட மசோதா-2025 பேரவையில் புதன்கிழமை அறிமுகம் செய்யப்பட்டது.