இஸ்ரேல்-ஈரான் தாக்குதல் நீடிப்பு: 3-ஆவது நாளாக ஏவுகணைகள் வீச்சு

இஸ்ரேல்-ஈரான் இடையிலான தாக்குதல் 3-ஆவது நாளாக ஞாயிற்றுக்கிழமையும் நீடித்தது. இரு நாடுகளும் ஏவுகணைகளை வீசி தாக்கிக்கொண்டன.

- 

ஜெருசலேம், ஜூன் 15:

ஈரான் அணு ஆயுதங்களைத் தயாரித்தால், அது இஸ்ரேலுக்கு ஆபத்து என அந்நாடு கருதுகிறது. இதையடுத்து ஈரான் அணு ஆயுதம் தயாரிப்பதைத் தடுக்கும் நோக்கில், அந்நாட்டின் அணுசக்தி கட்டமைப்புகளைக் குறிவைத்து கடந்த வெள்ளிக்கிழமை இஸ்ரேல் தாக்குதலைத் தொடங்கியது. இதைத் தொடர்ந்து, இஸ்ரேல் மீது ஈரானும் தாக்குதல் மேற்கொண்டு வருகிறது.

இந்தத் தாக்குதல் தொடர்ந்து 3-ஆவது நாளாக ஞாயிற்றுக்கிழமையும் நீடித்தது. ஈரான் தலைநகர் டெஹ்ரானில் உள்ள அந்நாட்டுப் பாதுகாப்பு அமைச்சக தலைமையகம், அணுசக்தி திட்டத்துடன் தொடர்புள்ளதாகக் கூறப்படும் இடங்களைக் குறிவைத்து இஸ்ரேல் தாக்குதல் மேற்கொண்டது.

அதேவேளையில், இஸ்ரேலின் வான் பாதுகாப்பு அமைப்புகளைத் தாண்டி அந்நாட்டுக்குள் வெகு தொலைவு வரை சென்று ஈரானின் ஏவுகணைகள் தாக்கின.