நா காக்க...காவலாகால்...

கன்னட மொழிக்கும் நடிகர் கமல்ஹாசனுக்கும் மிகவும் நெருங்கிய தொடர்பு உண்டு. இதை நடிகர் கமல்ஹாசனும் பலமுறை கூறியிருக்கிறார். கன்னட மக்களுக்கும் கமல் மீது அளவில்லா அன்பு உண்டு என்பதை பலமுறை வெளிப்படுத்தியிருக்கிறார்கள்.

- ந. முத்துமணி

பெங்களூரு, ஜூன் 5: கன்னட மொழிக்கும் நடிகர் கமல்ஹாசனுக்கும் மிகவும் நெருங்கிய தொடர்பு உண்டு. இதை நடிகர் கமல்ஹாசனும் பலமுறை கூறியிருக்கிறார். கன்னட மக்களுக்கும் கமல் மீது அளவில்லா அன்பு உண்டு என்பதை பலமுறை வெளிப்படுத்தியிருக்கிறார்கள்.

1977 ஆம் ஆண்டு பாலுமகேந்திரா இயக்கத்தில் வெளியான 'கோகிலா' படத்தின் மூலம் கன்னட திரையுலகில் கால் பதித்தார் நடிகர் கமல்ஹாசன். சென்னையில் 140 நாட்கள் ஓடிய ஒரே கன்னட படம் என்ற சாதனையை அது படைத்தது.

இதைத் தொடர்ந்து, 1978 இல் கே. பாலசந்தர் இயக்கத்தில் உருவான 'தப்பித தாளா', 1980 இல் துரை இயக்கத்தில் படைக்கப்பட்ட 'மரியா மை டார்லிங்', 1983 இல் கே. பாலசந்தர் இயக்கத்தில் வெளியான 'பெங்கியல்லி அரளித ஹூவு', சிங்கீதம் சீனிவாசராவ் இயக்கத்தில் உருவான 'புஷ்பக விமான', 2005 இல் ரமேஷ் அரவிந்த் இயக்கத்தில் வெளியான 'ராமா ஷாமா பாமா' போன்ற கன்னட திரைப்படங்களில் நடித்து கன்னட ரசிகர்களையும் பெற்றிருக்கிறார்.

தமிழில் வெளியாகும் கமல்ஹாசனின் படங்களை கன்னடர்கள் ஆர்வமாக ரசிப்பது உண்டு. அப்படித்தான் அவரின் 'தக் லைஃப்' படத்தையும் காண ஆர்வமாக இருந்தனர். நடிப்பை மட்டுமல்லாது, கமலின் அறிவார்ந்த உரையாடல்கள், பேட்டிகளை பாராட்டும் கன்னடர்கள் ஏராளம்.