100 நாள் வேலைத் திட்ட நிதி: மத்திய அரசைக் கண்டித்து திமுக ஆர்ப்பாட்டம்

தேசிய ஊரக வேலை உறுதித் திட்ட நிதியை ஒதுக்காத மத்திய அரசைக் கண்டித்து சனிக்கிழமை திமுகவினர் ஆர்ப்பாட்டத்தில் ஈடுபட்டனர்.

- 

திருவள்ளூர், மார்ச் 29:

திருவள்ளூர் அருகே பூண்டி வட்டார வளர்ச்சி அலுவலகம் முன்பு நடைபெற்ற ஆர்ப்பாட்டத்துக்கு ஒன்றிய செயலாளர் கிறிஸ்டி என்ற அன்பரசு தலைமை வகித்தார். இதில் சிறப்பு அழைப்பாளராக திருவள்ளூர் சட்டப்பேரவை உறுப்பினர் வி.ஜி.ராஜேந்திரன் பங்கேற்று ஆர்ப்பாட்டத்தைத் தொடங்கி வைத்தார்.

ஆர்ப்பாட்டத்தில் ஒன்றிய அவைத் தலைவர் பட்டரை பாஸ்கர், மாவட்டப் பிரதிநிதி சிட்டிபாபு, இளைஞர் அணி துணை அமைப்பாளர் மோதிலால், முன்னாள் ஒன்றியக்குழு துணைத் தலைவர் மகாலட்சுமி, ஒன்றிய துணைச் செயலாளர்கள் சித்ரா ரமேஷ், ஆனந்தராஜ், முன்னாள் நகர்மன்ற தலைவர் பொன்.பாண்டியன், முன்னாள் ஒன்றியக்குழு உறுப்பினர்கள் மஞ்சு லிங்கேஷ், சுபாஷினி, நிர்வாகிகள் ராமதண்டலம், சுதர்சனம் உள்ளிட்ட அக்கட்சியினர் திரளாகக் கலந்து கொண்டனர்.

இதேபோல், திருவள்ளூர் அருகே மணவாளநகரில் நடைபெற்ற ஆர்ப்பாட்டத்துக்கு அவைத் தலைவர் திராவிடபக்தன், ஒன்றிய செயலாளர் ஹரிகிருஷ்ணன், பேரம்பாக்கத்தில் ஒன்றியச் செயலாளர் கொண்டஞ்சேரி ரமேஷ், காக்களூரில் ஒன்றிய செயலாளர் ஜெயசீலன், புதுச்சத்திரம் ஒன்றிய செயலாளர் தேசிங்கு, தாமரைபாக்கம் புஜ்ஜிராமகிருஷ்ணன், செவ்வாப்பேட்டை ஒன்றிய செயலாளர் பிரேம் ஆனந்த், மாவட்ட பொருளாளர் நரேஷ் ஆகியோர் தலைமையிலும் நடைபெற்ற ஆர்ப்பாட்டங்கள் நடைபெற்றன.