தமிழ் பற்றுக்கொண்ட அரசியல் தலைவர்!

தமிழக அரசியலில் கட்சித் தலைமை, இலக்கியப் புலமை இரண்டும் சேர்ந்து முக்கியத்துவம் பெற்ற தலைவர்கள் அபூர்வம். குமரி அனந்தன் அப்படிப்பட்ட அபூர்வ தலைவர்களில் ஒருவர்.

- கோ.விசுவநாதன்

காந்திய கொள்கையில் தீவிர ஈடுபாடு கொண்ட அனந்தன், பள்ளி நாள்களில் பேச்சுப் போட்டிகளில் கலந்து கொண்டு குமரி மாவட்டத்தில் கவனிக்கத் தகுந்த ஓர் மாணவராக இருந்தவர். கல்லூரி நாள்களில் அவரது கவனம் காங்கிரஸ் கட்சியின் மீது சென்றது. இளைஞர் காங்கிரஸில் தனது அரசியலைத் தொடங்கிய குமரி அனந்தன், காமராஜரிடம் நெருங்கிப் பழகியவர்; அவரது அன்புக்குப் பாத்திரமானவர்.

நான்கு முறை சட்டப்பேரவை உறுப்பினர், ஒருமுறை மக்களவை உறுப்பினராகவும் இருந்தவர் குமரி அனந்தன். காங்கிரஸ் கட்சி இரண்டாக பிளவுபட்டபோது ஸ்தாபன காங்கிரஸில் குமரி அனந்தன் இருந்தார். அப்போது ஜனதா கட்சியில் இணைந்த ஸ்தாபன காங்கிரஸ் வேட்பாளராகப் போட்டியிட்டு வெற்றி பெற்றார்.

தமிழ்நாட்டில் குமரி அனந்தன் உள்பட மூன்று பேர் மக்களவைத் தேர்தலில் ஸ்தாபன காங்கிரஸ் சார்பாக வெற்றி பெற்றார்கள். வேலூரில் வி.தண்டாயுதபாணியும் மத்திய சென்னையில் பா.ராமச்சந்திரனும் வெற்றி பெற்றார்கள். பா.ராமச்சந்திரன் மத்திய மின்சாரத் துறை அமைச்சரானார்.

ஏற்கெனவே குமரி அனந்தன் எனக்கு பழக்கம் என்றாலும் 1977-இல்தான் அவருடனான நெருக்கம் அதிகமானது. அந்த நெருக்கம் தொடர்ந்தது.