ஹசீனாவுக்கு மரண தண்டனை

வங்கதேச நீதிமன்றம் தீர்ப்பு

- 

வங்கதேசத்தில் கடந்த ஆண்டு மாணவர்கள் போராட்டத்தின்போது நடைபெற்ற வன்முறைச் சம்பவங்கள் தொடர்பாக, அப்போது பிரதமராகப் பதவி வகித்த ஷேக் ஹசீனாவுக்கு மரண தண்டனை விதித்து வங்கதேசத்தின் சர்வதேச குற்றவியல் தீர்ப்பாயம் திங்கள்கிழமை தீர்ப்பளித்தது.

வங்கதேச சுதந்திரப் போராட்டத்தில் பங்கேற்ற தியாகிகளின் வாரிசுகளுக்கு அரசுப் பணிகளில் 30 சதவீத இடஒதுக்கீடு வழங்க எதிர்ப்புத் தெரிவித்து, அந்நாட்டில் கடந்த ஆண்டு ஜூலை 1-ஆம் தேதிமுதல் போராட்டங்கள் நடைபெற்றன. பெரும்பாலும் மாணவர்கள் பங்கேற்ற இந்தப் போராட்டத்தில், போராட்டக்காரர்களுக்கும் காவல் துறைக்கும் கடுமையான மோதல் சம்பவங்கள் ஏற்பட்டன.

இந்தப் போராட்டங்களால் வன்முறை மூண்ட நிலையில், அங்குள்ள 50 மாவட்டங்களில் 36 நாள்கள் வன்முறைச் சம்பவங்கள் நடைபெற்றன. இதில் சுமார் 1,400 பேர் கொல்லப்பட்டனர்; 25,000 பேர் காயமடைந்தனர்.

மாணவர்களை சமாதானப்படுத்த முடியாமலும், நாட்டில் மீண்டும் அமைதியை நிலைநாட்ட முடியாமலும் கடந்த ஆண்டு ஆகஸ்டில் பிரதமர் பதவியை ஷேக் ஹசீனா ராஜினாமா செய்தார்.

பின்னர், அவர் ராணுவ ஹெலிகாப்டரில் வங்கதேசத்தில் இருந்து தப்பி இந்தியாவில் தஞ்சமடைந்தார். அவர் இந்தியாவில் எங்குள்ளார் என்ற தகவல் வெளியாகவில்லை.

இதேபோல அந்நாட்டின் அப்போதைய உள்துறை அமைச்சராக இருந்த அசதுஸ்ஸமான் கான் கமாலும் இந்தியாவில் தஞ்சமடைந்துள்ளதாக நம்பப்படுகிறது. ஷேக் ஹசீனா ராஜினாமா செய்ததைத் தொடர்ந்து, அந்நாட்டு இடைக்கால அரசின் தலைவராக அமைதிக்கான நோபல் பரிசு பெற்ற முகமது யூனுஸ் பதவியேற்றார்.

453 பக்க தீர்ப்பு:

இந்த வன்முறைச் சம்பவங்கள் தொடர்பாக தலைநகர் டாக்காவில் உள்ள சர்வதேச குற்றவியல் தீர்ப்பாயம் விசாரணை மேற்கொண்டு வந்தது. பல மாதங்களாக விசாரணை நடைபெற்ற நிலையில், நீதிபதி குலாம் முர்தாசா மஜூம்தார் தலைமையிலான 3 பேர் கொண்ட அமர்வு திங்கள்கிழமை (நவ.17) தீர்ப்பளித்தது.