விண்வெளி வீரர் சுக்லாவுடன் கலந்துரையாடிய பிரதமர் மோடி

சர்வதேச விண்வெளி நிலையத்தில் உள்ள இந்திய வீரர் சுபான்ஷு சுக்லாவுடன் பிரதமர் நரேந்திர மோடி காணொலி இணைப்பு வாயிலாக சனிக்கிழமை கலந்துரையாடினார்.

- 

புது தில்லி, ஜூன் 28: சர்வதேச விண்வெளி நிலையத்தில் உள்ள இந்திய வீரர் சுபான்ஷு சுக்லாவுடன் பிரதமர் நரேந்திர மோடி காணொலி இணைப்பு வாயிலாக சனிக்கிழமை கலந்துரையாடினார்.

‘சுபான்ஷு சுக்லாவின் விண்வெளிப் பயணம், இந்தியாவுக்கு புதிய சகாப்தத்தின் தொடக்கம்; ககன்யான் திட்டத்துக்கு உந்து சக்தி, முதல் படி’ என்று அவரிடம் பிரதமர் பெருமிதத்துடன் குறிப்பிட்டார்.

புதிய சகாப்தத்தின் தொடக்கம்: பூமியில் இருந்து 400 கி.மீ. உயரத்தில் சுற்றிவரும் சர்வதேச விண்வெளி நிலையத்தில் உள்ள சுபான்ஷு சுக்லாவுடன் பிரதமர் மோடி காணொலி இணைப்பு வாயிலாக கலந்துரையாடி, ஆய்வுகள் குறித்து கேட்டறிந்தார். சுமார் 16 நிமிஷங்கள் இந்த உரையாடல் நடைபெற்றது.

‘சுபான்ஷு, நீங்கள் இப்போது இந்திய மண்ணில் இருந்து வெகு தொலைவில் இருந்தாலும், ஒட்டுமொத்த இந்தியர்களின் இதயத்துக்கு நெருக்கமாக உள்ளீர்கள். மங்களகரமான பெயரை (சுப) தாங்கிய உங்களுடைய விண்வெளிப் பயணம், புதிய சகாப்தத்தின் மங்களகரமான தொடக்கம்; ககன்யான் திட்டத்துக்கான முதல் படி. இத்திட்டத்தை அடுத்தகட்டத்துக்கு இட்டுச் செல்ல வேண்டும். விண்வெளியில் இந்தியாவும் தனது சொந்த ஆய்வு மையத்தை அமைக்க வேண்டும். நிலவில் இந்திய வீரர் தடம் பதிப்பதை உறுதி செய்ய வேண்டும்.

எதிர்கால விண்வெளித் திட்டங்கள் அனைத்திலும் உங்களின் அனுபவங்கள் மிக முக்கியப் பங்கு வகிக்கும்.