மொழியின் பெயரால் நாட்டை துண்டாக்காதீர்கள்

ராஜ்நாத் சிங் வேண்டுகோள்

- நமது நிருபர்

நமது நிருபர் புதுதில்லி, மார்ச் 29: மொழியின் பெயரில் நாடு துண்டாடப்படுவது நிறுத்தப்பட வேண்டும் என்று பாதுகாப்புத் துறை அமைச்சர் ராஜ்நாத் சிங் கேட்டுக் கொண்டார்.

ஆங்கிலேயருக்கு எதிராகப் போரிட்ட முதல் அரசியாக அறியப்படும் ராணி வேலு நாச்சியார் தொடர்பான 'நாடக அஞ்சலி' நிகழ்ச்சியும், சுதந்திரப் போராட்டத்தில் பங்கேற்ற நாட்டின் பல்வேறு பகுதிகளைச் சேர்ந்த 75 பெண் சுதந்திரப் போராட்ட வீராங்கனைகள் குறித்த தகவல்கள், புகைப்படங்கள் இடம்பெற்ற நூல் வெளியீட்டு நிகழ்ச்சியும் பாஜகவின் தேசிய மகளிர் அணியின் சார்பில் நடைபெற்றது.

புது தில்லியில் மாநகராட்சி சிவிக் சென்டரில் சனிக்கிழமை மாலை நடைபெற்ற இந்த நிகழ்ச்சியில் பாதுகாப்புத் துறை அமைச்சர் ராஜ்நாத் சிங் பேசியதாவது: சுதந்திரப் போராட்டத்தில் தென்னிந்தியாவைச் சேர்ந்த பலர் சிறந்த பங்களிப்பைச் செய்துள்ளனர். அது தொடர்புடைய தகவல்கள் வட இந்தியாவைச் சேர்ந்த மக்களுக்குச் சென்றடையும் வகையில் இந்த நிகழ்ச்சியை ஏற்பாடு செய்திருக்கும் பாஜகவின் மகளிரணி பிரிவினருக்கு எனது வாழ்த்துகள்.

தமிழகத்தைச் சேர்ந்த ராணி வேலுநாச்சியார் ஆங்கிலேயருக்கு எதிரான போராட்டத்தில் மிகச் சிறந்த பங்களிப்பைச் செய்திருக்கிறார். வீரமிக்க அவர், தெலுங்கு, மலையாளம், பிரெஞ்சு ஆகிய மொழிகளையும் அறிந்தவர்.