ஜம்மு-காஷ்மீருக்கு மீண்டும் மாநில அந்தஸ்து: பிரதமருக்கு ராகுல், கார்கே கடிதம்

'ஜம்மு-காஷ்மீருக்கு மீண்டும் முழு மாநில அந்தஸ்து அளிக்கும் வகையில் வரும் மழைக்கால கூட்டத் தொடரில் சட்டம் இயற்றப்பட வேண்டும்' என்று எதிர்க்கட்சித் தலைவர் ராகுல் காந்தி மற்றும் காங்கிரஸ் தேசியத் தலைவரும் மாநிலங்களவை எதிர்க்கட்சித் தலைவருமான மல்லிகார்ஜுன கார்கே ஆகியோர் வலியுறுத்தினர்.

- 

புது தில்லி, ஜூலை 16:

இதுதொடர்பாக பிரதமர் நரேந்திர மோடிக்கு அவர்கள் இருவரும் புதன்கிழமை கடிதம் எழுதியுள்ளனர்.

மத்திய பாஜக அரசு கடந்த 2019-ஆம் ஆண்டு ஆகஸ்ட் 5-ஆம் தேதி ஜம்மு-காஷ்மீருக்கு சிறப்பு அந்தஸ்து வழங்கிய அரசியலமைப்புச் சட்டத்தின் 370-ஆவது பிரிவை ரத்து செய்தது. அதைத் தொடர்ந்து, ஜம்மு-காஷ்மீர் மறுசீரமைப்புச் சட்டம் 2019-ஐ இயற்றி, ஜம்மு-காஷ்மீர் மாநிலத்தை ஜம்மு-காஷ்மீர், லடாக் என இரு யூனியன் பிரதேசங்களாக பிரித்தது.