உக்ரைனில் ரஷியா இதுவரை இல்லாத தீவிர தாக்குதல்

உக்ரைன் முழுவதும் ரஷியா இதுவரை இல்லாத மிகப் பெரிய தாக்குதலை நடத்தியுள்ளது.

- 

கீவ், ஜூலை 9: இந்தப் போர் விவகாரம் தொடர்பாக ரஷிய அதிபர் விளாதிமீர் புதினை அமெரிக்க அதிபர் டொனால்ட் டிரம்ப் கடுமையாக விமர்சித்ததற்குப் பின் இந்தத் தாக்குதல் நடத்தப்பட்டுள்ளது.

இது குறித்து உக்ரைன் விமானப்படை வெளியிட்டுள்ள அறிக்கையில் தெரிவிக்கப்பட்டுள்ளதாவது:

செவ்வாய்க்கிழமை இரவு முதல் புதன்கிழமை அதிகாலை வரை ரஷிய படைகள் உக்ரைன் மீது இதுவரை இல்லாத மிகப் பெரிய வான்வழித் தாக்குதலை நடத்தின. இந்தத் தாக்குதலுக்கு 728 ட்ரோன்கள், 7 இஸ்கண்டர்-கே க்ரூஸ் ஏவுகணைகள், 6 கின்ஷால் ஹைப்பர்சோனிக் ஏவுகணைகளை ரஷியா பயன்படுத்தியது. இதில் 7 இஸ்கண்டர்-கே ஏவுகணைகள், 296 ட்ரோன்களை பிற பாதுகாப்புப் பிரிவுகளுடன் ஒருங்கிணைந்து உக்ரைன் விமானப்படை இடைமறித்து அழித்தது.

இந்தத் தாக்குதலில் உக்ரைன் முழுவதும் உள்ள முக்கிய உள்கட்டமைப்புகளை ரஷியா குறிவைத்தது என்று அந்த அறிக்கையில் தெரிவிக்கப்பட்டுள்ளது.