பிற்படுத்தப்பட்ட, பட்டியலின சமூகத்தினரை இரண்டாம்தர குடிமக்களாக்கிய காங்கிரஸ்

'காங்கிரஸ் ஆட்சியில் இருந்தபோது பட்டியலின பிரிவினர், பழங்குடியினர் மற்றும் இதர பிற்படுத்தப்பட்ட சமூகத்தினரை இரண்டாம் தர குடிமக்களாக மாற்றியது' என்று பிரதமர் நரேந்திர மோடி திங்கள்கிழமை கடுமையாக விமர்சித்தார்.

- 

ஹிசார், ஏப். 14:

ஆட்சிக்கு ஆபத்து வந்தபோதெல்லாம் அரசமைப்புச் சட்டத்தை நசுக்கிய காங்கிரஸ் கொண்டு வக்ஃப் சட்டத் திருத்தங்களால் முஸ்லிம்களில் சிலர் மட்டுமே பயனடைந்தனர் என்றும் அவர் குற்றஞ்சாட்டினார்.

ஹரியாணா மாநிலம், ஹிசாரில் உள்ள மகாராஜா அகர்சன் விமான நிலையத்திலிருந்து அயோத்திக்கு முதல் பயணிகள் விமானத்தைகொடியசைத்து தொடக்கி வைத்து, விமான நிலையத்தின் புதிய முனையத்தின் பணிகளுக்கும் பிரதமர் மோடி திங்கள்கிழமை அடிக்கல் நாட்டினார்.

மேலும், இந்நிகழ்ச்சியில் மாநிலத்தில் உள்ள தீன்பந்து சோட்டு ராம் அனல் மின் நிலையத்தில் ரூ.8,470 கோடி மதிப்பீட்டில் அமைக்கப்படும் 800 மெகாவாட் திறன்கொண்ட அனல் மின் அலகுக்கும் அவர் அடிக்கல் நாட்டினார். தொடர்ந்து, கூட்டத்தில் பிரதமர் மோடி ஆற்றிய உரை: அரசமைப்புச் சட்டத்தின் அடிப்படையே தேசம் ஒரு பொது சிவில் சட்டத்தைக் கொண்டிருக்க வேண்டும் என்று வலியுறுத்துகிறது. உத்தரகண்டில் பாஜக அரசு பொது சிவில் சட்டத்தை அமல்படுத்தியுள்ளது. அரசமைப்புச் சட்ட நகலுடன் சுற்றிவரும் காங்கிரஸ் தலைவர்கள் அதை எதிர்க்கின்றனர். காங்கிரஸ் அரசு ஆபத்தை எதிர்கொண்ட ஒவ்வொரு முறையும் அம்பேத்கர் உருவாக்கிய அரசமைப்புச் சட்டத்தை நசுக்கியது. அதிகாரம் பெறுவதற்கான ஆயுதமாக அரசமைப்புச் சட்டம் பயன்படுத்தப்பட்டது.