அணுசக்தி நீர்மூழ்கிக் கப்பல்களை அனுப்ப டிரம்ப் உத்தரவு

ரஷிய முன்னாள் அதிபரின் போர் மிரட்டல் எதிரொலி

- 

வாஷிங்டன், ஆக. 2: ரஷியாவின் முன்னாள் அதிபரும் தற்போதைய தேசிய பாதுகாப்பு கவுன்சில் துணைத் தலைவருமான டிமித்ரி மெத்வதெவ் விடுத்துள்ள போர் மிரட்டலின் எதிரொலியாக, தங்களது இரு அணுசக்தி நீர்மூழ்கிக் கப்பல்களை 'உரிய பகுதிகளுக்கு அனுப்ப உத்தரவிட்டுள்ளதாக அமெரிக்க அதிபர் டொனால்ட் டிரம்ப் தெரிவித்துள்ளார்.

இது குறித்து தனது ட்ரூத் சோஷியல் சமூக ஊடகத்தில் அவர் தெரிவித்துள்ளதாவது: ரஷியாவின் முன்னாள் அதிபரும், தற்போது அந்த நாட்டின் தேசிய பாதுகாப்பு கவுன்சிலின் துணைத் தலைவருமான டிமித்ரி மெத்வதெவ் மிகவும் சீற்றத்தை ஏற்படுத்தும் வகையில் மிரட்டல் விடுத்துள்ளார். அதன் அடிப்படையில், இரண்டு அணுசக்தி நீர்மூழ்கிக் கப்பல்களை உரிய பகுதிகளுக்கு அனுப்ப உத்தரவிட்டுள்ளேன் என்று தனது பதிவில் டிரம்ப் தெரிவித்துள்ளார்.

எனினும், அந்த நீர்மூழ்கிக் கப்பல்கள் எங்கு அனுப்பப்படவுள்ளன என்பதை அவர் குறிப்பிடவில்லை. மேலும், அணுசக்தியில் இயங்கும் அந்த நீர்மூழ்கிக் கப்பல்களில் அணு ஆயுதங்கள் இருக்குமா என்பது குறித்தும் அவர் எதுவும் தெரிவிக்கவில்லை. பின்னர் இது குறித்து செய்தியாளர்களிடம் பேசிய டிரம்ப், 'எங்களுக்கு மிரட்டல் விடுக்கப்பட்டுள்ளது. அதை நாங்கள் சாதாரணமாகக் கருத முடியாது. எனவே மிகவும் எச்சரிக்கையாக இருக்க வேண்டியிருப்பதால் இந்த முடிவு எடுக்கப்பட்டுள்ளது' என்றார்.