நாடாளுமன்ற சிறப்புக் கூட்டத்தைக் கூட்ட வேண்டும்

இந்தியாவின் 'ஆபரேஷன் சிந்தூர்' நடவடிக்கை குறித்து உலகுக்கு தெளிவான தகவலைத் தெரியப்படுத்தும் வகையில் நாடாளுமன்ற சிறப்புக் கூட்டத்தை மத்திய அரசு கூட்ட வேண்டும் என்று அனைத்துக் கட்சிக் கூட்டத்தில் காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி ஆகியோர் வலியுறுத்தினர்.

- 

புது தில்லி, மே 8:

பஹல்காம் பயங்கரவாத நடவடிக்கைக்கு பதிலடி கொடுக்கும் வகையில் இந்தியா மேற்கொண்ட 'ஆபரேஷன் சிந்தூர்' நடவடிக்கை குறித்து விளக்கம் அளிக்க அனைத்துக் கட்சிக் கூட்டத்தை மத்திய அரசு தில்லியில் வியாழக்கிழமை கூட்டியது.

இந்தக் கூட்டத்துக்குப் பிறகு செய்தியாளர்களைச் சந்தித்த காங்கிரஸ் தலைவர் மல்லிகார்ஜுன கார்கே கூறியதாவது: பயங்கரவாதத்துக்கு எதிரான இந்த நடவடிக்கை குறித்து அனைத்து கட்சிக் கூட்டத்தில் பிரதமர் நரேந்திர மோடி விவரிப்பார் என எதிர்பார்த்தோம். ஆனால், அவர் பங்கேற்கவில்லை. இதற்கு முன்பு நடத்தப்பட்ட அனைத்துக் கட்சிக் கூட்டத்திலும் பிரதமர் பங்கேற்கவில்லை.