திருச்செந்தூரில் சூரசம்ஹாரம்: பல லட்சம் பக்தர்கள் தரிசனம்

திருச்செந்தூர் சுப்பிரமணிய சுவாமி கோயில் கந்தசஷ்டி விழாவின் சிகர நிகழ்வான சூரசம்ஹாரம் பல லட்சம் பக்தர்களின் அரோகரா கோஷம் முழங்க திங்கள்கிழமை மாலை கோயில் கடற்கரையில் வெகு விமரிசையாக நடைபெற்றது.

- 

கும்பாபிஷேகத்தை காண திருச்செந்தூர் கோயில் கடற்கரையில் குவிந்த பக்தர்கள் கூட்டம். (உள்படம்) குரம்பநாத் சுவாமிகள் பங்கேற்ற இந்து சமய அறநிலையத் துறை அமைச்சர் பி.கே.சேகர்பாபு.

திருச்செந்தூர் சுப்பிரமணிய சுவாமி கோயிலில் நிகழாண்டு கந்தசஷ்டி விழா கடந்த அக். 22 ஆம் தேதி யாகசாலை பூஜைகளுடன் தொடங்கியது. தினமும் அதிகாலை கோயில் நடை திறக்கப்பட்டு, விஸ்வரூப தரிசனம், உதய மார்த்தாண்ட அபிஷேகம் உள்ளிட்ட பூஜைகள் நடைபெற்றன.

சிகர நிகழ்வான சூரசம்ஹாரத்தையொட்டி, திங்கள்கிழமை அதிகாலை 1 மணிக்கு கோயில் நடை திறக்கப்பட்டு, 1.30 மணிக்கு விஸ்வரூப தரிசனம் உள்ளிட்ட பூஜைகள் நடைபெற்றன. சுவாமி வைர கிரீடத்துடனும், தங்க அங்கியும் அணிந்து சர்வ அலங்காரத்தில் அருள்பாலித்தார்.

பின்னர், யாகசாலைக்கு காலை 6 மணிக்கு சுவாமி ஜெயந்திநாதர் எழுந்தருளினார். அதையடுத்து சண்முக விலாசத்துக்கும், திருவாவடுதுறை ஆதீன கந்தசஷ்டி மண்டபத்துக்கும் சுவாமி எழுந்தருளினார். அங்கு சிறப்பு அபிஷேக, ஆராதனைக்குப் பின்னர் மாலை 4.30 மணிக்கு தங்கமயில் வாகனத்தில் சுவாமி சூரசம்ஹாரத்துக்கு புறப்பட்டார்.