குடியரசு துணைத் தலைவர் பதவிக்கு இன்று தேர்தல்

நாட்டின் 17-ஆவது குடியரசு துணைத் தலைவர் பதவிக்கான தேர்தல் செவ்வாய்க்கிழமை (செப். 9) நடைபெறவுள்ளது.

- 

புது தில்லி, செப். 8:

இதில், பாஜக தலைமையிலான ஆளும் தேசிய ஜனநாயக கூட்டணி சார்பில் சி.பி. ராதாகிருஷ்ணனும் (67), எதிர்க்கட்சிகளின் 'இண்டி' கூட்டணி சார்பில் பி. சுதர்சன் ரெட்டியும் (79) போட்டியிடுகின்றனர்.

இந்தத் தேர்தலுக்கான வாக்குப்பதிவு, நாடாளுமன்ற வளாகத்தில் அறை எண். எஃப்-101-இல் காலை 10 மணி முதல் மாலை 5 மணி வரை நடைபெற உள்ளது. பதிவான வாக்குகள் மாலை 6 மணிமுதல் எண்ணப்பட்டு, அன்றைய தினமே முடிவுகள் அறிவிக்கப்பட உள்ளன.

தேசிய ஜனநாயக கூட்டணியின் (என்டிஏ) குடியரசு துணைத் தலைவர் வேட்பாளரான தமிழகத்தைச் சேர்ந்த மூத்த தலைவரும் மகாராஷ்டிர ஆளுநருமான சி.பி.ராதாகிருஷ்ணன், கோவை தொகுதியிலிருந்து இரண்டு முறை மக்களவைக்குத் தேர்ந்தெடுக்கப்பட்டவர். தமிழக பாஜக தலைவராகவும் பதவி வகித்தவர்.