ஈரான் கடும் பதிலடி: இஸ்ரேல் எச்சரிக்கை

இரு தரப்பிலும் 80-க்கும் மேற்பட்டோர் உயிரிழப்பு

- 

ஜெருசலேம், ஜூன் 14: மத்திய கிழக்கு பிராந்தியத்தில் இஸ்ரேல்-ஈரான் இடையிலான மோதல் தீவிரமடைந்துள்ளது. பரஸ்பர தாக்குதலில் ஈரானில் 78 பேரும், இஸ்ரேலில் மூவரும் உயிரிழந்தனர்.

இஸ்ரேல் மீது ஈரான் நூற்றுக்கணக்கான ஏவுகணைகளை ஏவிய நிலையில், வரும் நாள்களில் ஈரான் மீது மிகப் பெரிய தாக்குதல்கள் நடத்தப்படும் என்று இஸ்ரேல் பிரதமர் நெதன்யாகு தெரிவித்தார்.

‘ஆபரேஷன் ரைசிங் லயன்’

ஈரான் அணு ஆயுதம் தயாரிப்பதைத் தடுக்கும் நோக்கில், அந்நாட்டின் அணுசக்தி கட்டமைப்புகளை அழிக்க இஸ்ரேல் முடிவு செய்தது. ‘ஆபரேஷன் ரைசிங் லயன்’ என்ற பெயரில் ஈரானின் அணுசக்தி தளங்கள், ஏவுகணைத் தயாரிப்புத் தளங்கள், மூத்த அணுசக்தி விஞ்ஞானிகள், ராணுவத் தளபதிகளைக் குறிவைத்து இந்தத் தாக்குதல் மேற்கொள்ளப்பட்டது.

போர் விமானங்கள், ட்ரோன்கள் மூலம் மேற்கொள்ளப்பட்ட இந்தத் தாக்குதலில், ஈரான் ஆயுதப் படைகளின் தலைமைத் தளபதி முகமது பகேரி, ஈரான் புரட்சிகர காவல் படை தலைமை தளபதி ஹுசேன் சலாமி, அணுசக்தி விஞ்ஞானிகள் உள்ளிட்டோர் கொல்லப்பட்டனர்.

இந்தத் தாக்குதலைத் தொடர்ந்து, ஈரானின் அணுசக்தி திட்டத்தை அழிக்க கடந்த ஆண்டு நவம்பரிலேயே உத்தரவிட்டதாகவும், நிகழாண்டு ஏப்ரலில் மேற்கொள்ளத் திட்டமிடப்பட்ட இந்தத் தாக்குதல், தற்போது நடத்தப்பட்டதாகவும் இஸ்ரேல் மக்களிடம் அந்நாட்டுப் பிரதமர் பெஞ்சமின் நெதன்யாகு தெரிவித்தார்.