கச்சத்தீவை தாரைவார்த்தது யார்? பாஜகவுக்கு துரைமுருகன் சவால்

கச்சத்தீவை இலங்கைக்கு அளித்த விவகாரத்தில், பாஜகவுக்கு அவை முன்னவர் மற்றும் அமைச்சருமான துரைமுருகன் சவால் விடுத்தார்.

- 

சென்னை, ஏப். 2: கச்சத்தீவை இலங்கைக்கு அளித்த விவகாரத்தில், பாஜகவுக்கு அவை முன்னவர் மற்றும் அமைச்சருமான துரைமுருகன் சவால் விடுத்தார்.

கச்சத்தீவு மீட்டெடுப்பு, மீனவர்கள் பாதுகாப்பு தொடர்பாக சட்டப்பேரவையில் புதன்கிழமை கொண்டுவரப்பட்ட அரசின் தனித் தீர்மானத்தின் மீது பாஜக உறுப்பினர் வானதி சீனிவாசன் பேசினார். அப்போது நடந்த விவாதம்:

வானதி சீனிவாசன் (பாஜக): மீனவர்கள் நலனில் மத்திய அரசு பாரபட்சம் பார்ப்பதில்லை. எந்தக் குடிமகனாக இருந்தாலும் அவர்களுக்கான பிரச்னையைத் தீர்ப்பதில் மத்திய அரசு முனைப்பு காட்டி வருகிறது.

இலங்கைக்கு கச்சத்தீவு அளிக்கப்பட்ட நேரத்தில், அதை நாடாளுமன்றத்தில் திமுக உறுப்பினர்கள் இரா.செழியன், நாஞ்சில் மனோகரன் ஆகியோர் எதிர்த்து கடுமையான வாதங்களை முன்வைத்தனர்.

கச்சத்தீவை அளித்தது முற்றிலும் சட்டவிரோதமானது என்று பேசும்போது, அவர்களுக்கு மறைந்த முன்னாள் பிரதமர் வாஜ்பாய் ஆதரவு அளித்தார். எங்களது அகில இந்திய தலைவர் ஜனா கிருஷ்ணமூர்த்தியும் கச்சத்தீவை அளித்தது தவறு எனக் கூறி நீதிமன்றத்தில் வழக்குத் தொடர்ந்தார்.

கச்சத்தீவை தாரைவார்த்த நாளில் இருந்தே அது தவறு எனக் கூறி எங்களுடைய அகில இந்திய தலைவர்கள் பேசியுள்ளனர். அரசமைப்புச் சட்டத்துக்கு விரோதமாக கச்சத்தீவு தாரை வார்க்கப்பட்டது.