மின் பற்றாக்குறையைத் தவிர்க்கலாம்!

தமிழகத்தில் கோடை வெப்பம் தொடர்ந்து அதிகரித்துக் கொண்டே வருகிறது.

- முனைவர் என். பத்ரி

வீடுகளிலும், வணிக நிறுவனங்களிலும் அனைவரும் ஒரே நேரத்தில் குளிரூட்டும் பெட்டிகள் போன்ற மின்சாதனங்களைப் பயன்படுத்துவதால், உள்ளூர் மின் மாற்றிகள் அதிக மின்பளுவைச் சந்திக்கின்றன. இதனால் ஏற்படும் மின் தடையை அதிகபட்சம் 30 நிமிஷங்களுக்குள் சரி செய்து மீண்டும் மின் விநியோகத்தைச் சீரமைக்க வேண்டும் என்று மின் பொறியாளர்களுக்கு உத்தரவிடப்பட்டுள்ளது.கடந்த 2026, ஏப்ரல் 21 அன்று தமிழகத்தின் மின் தேவை புதிய உச்சத்தைத் தொட்டு 21,060 மெகாவாட்டாக இருந்தது. தமிழகத்தில் ஏற்கெனவே கோடை வெயிலின் தாக்கம் பல மாவட்டங்களில் 100 டிகிரி ஃபாரன்ஹீட்டுக்கு அதிகமாகப் பதிவாகி வருகிறது. இதனால், வீடுகளிலும், அலுவலகங்களிலும் மின்சாரத்தின் தேவை அதிகமாகி வருகிறது.

நிகழாண்டு மே மாதம் முதல் மின் பற்றாக்குறை தமிழகம், புதுச்சேரி, ஆந்திரம், தெலங்கானா, கேரளம், கர்நாடகம் ஆகிய தென் மாநிலங்களில் அதிகம் இருக்கும் எனக் கூறப்படுகிறது. தென் மாநிலங்களின் தினசரி மின் தேவை 69,934 மெகா வாட்டில் இருந்து தற்போது 73,805 மெகா வாட்டாக உயர்ந்துள்ளது. குறிப்பாக, தமிழகத்தின் மின் தேவை 19,679 மெகா வாட்டில் இருந்து தற்போது 19,822 மெகா வாட்டாக அதிகரித்து, தென் மாநிலங்களிலேயே மின் தேவையில் தமிழகம் முதலிடத்தில் உள்ளது.