என் மீதான குற்றச்சாட்டுகள் 100 சதவீதம் பொய்யானவை: அன்புமணி ராமதாஸ்

என் மீதான குற்றச்சாட்டுகள் 100 சதவீதம் பொய்யானவை; பாட்டாளி மக்கள் கட்சியின் வளர்ச்சிக்காக கடந்த 27 ஆண்டுகளாக உழைத்து வருகிறேன் என அக்கட்சியின் தலைவர் அன்புமணி ராமதாஸ் தெரிவித்தார்.

- 

சேலம், தருமபுரி, ஜூன் 19:

சேலம் ஒருங்கிணைந்த மாவட்ட பாட்டாளி மக்கள் கட்சி பொதுக்குழு கூட்டம் சேலத்தில் வியாழக்கிழமை நடைபெற்றது. இந்நிகழ்ச்சியில், பாமக தலைவர் அன்புமணி ராமதாஸ் கலந்துகொண்டார்.

அவருக்கு பிரம்மாண்டமான பழமாலை அணிவித்து கட்சி நிர்வாகிகள் உற்சாக வரவேற்பு அளித்தனர். பின்னர் நடைபெற்ற நிகழ்ச்சியில் அவர் பேசியதாவது:

கடந்த சில வாரங்களாக குழப்பம் நிலவி வருகிறது. என்மீது பல குற்றச்சாட்டுகள் வைக்கப்பட்டிருக்கின்றன. அனைத்து குற்றச்சாட்டுகளும் 100 சதவீதம் பொய்யானவை. இதுகுறித்து இன்னும் சில நாள்களில் தெளிவாக தெரியப்படுத்துவேன்.

நம் கட்சிக்காக, சமுதாயத்திற்காக மிகுந்த சுமையை அமைதியாக சுமந்துகொண்டிருக்கிறேன். கட்சித் தலைவர் பொறுப்பு பொதுக்குழுவில் தொண்டர்கள் கொடுத்தது. பொதுக்குழுவில் என்னையும் மற்ற நிர்வாகிகளையும் தொண்டர்கள் தான் தேர்ந்தெடுத்தனர்.

கட்சியை அடுத்தக்கட்டத்துக்கு கொண்டுசெல்ல வேண்டும் என்பதுதான் என்னுடைய நோக்கம்.

கடந்த 27 ஆண்டுகளாக அதற்காகத்தான் உழைத்துக் கொண்டிருக்கிறேன். முதன்முதலில் நான் கட்சிக்கொடியை ஏற்றியது சேலம் மேற்கு தொகுதியில்தான். கட்சி நிர்வாகிகள் அளித்த தைரியத்தில்தான் நான் இருக்கிறேன்.