தலைதூக்கும் புதிய ‘வீரப்பன்’கள்!

சந்தனமரக் கடத்தல் வீரப்பன் சுட்டுக் கொல்லப்பட்ட பிறகு தருமபுரி மாவட்ட வனப் பகுதிகளில் குறைந்திருந்த யானைகள் வேட்டை, இப்போது மீண்டும் தலைதூக்கி வருகிறது. இதனால், இப்பகுதியில் புதிதாக வீரப்பன்கள் உருவாகி உள்ளனரா என்ற கேள்வி அப்பகுதி மக்கள் மத்தியில் எழுந்துள்ளது.

- ஐவி.நாகராஜன்

தருமபுரி மாவட்ட வனப் பகுதி, கிருஷ்ணகிரி, சேலம், ஈரோடு மாவட்டங்கள் மற்றும் கர்நாடகம், கேரளம் உள்ளிட்ட வனப் பகுதிகளுடன் தொடர்புடையது. தருமபுரி மாவட்டத்தின் மொத்த பரப்பளவில் 1.66 லட்சம் ஹெக்டேர் வனப் பகுதியை உள்ளடக்கியது. இந்த வனப் பகுதியில் கணிசமான எண்ணிக்கையில் யானைகள் உள்ளன. அதேநேரம், மற்ற மாவட்ட, மாநில வனப் பகுதிகளில் இருந்தும் ஏராளமான யானைகள் பாலக்கோடு, ஒகேனக்கல், பென்னாகரம் வனப் பகுதிகளுக்கு அதிக அளவில் வந்துசெல்வது வழக்கம்.

வீரப்பன் இருந்தபோது சந்தன மரங்களை வெட்டிக் கடத்தியதுடன், யானைகளைக் கொன்று அதன் தந்தங்களையும் வெட்டி கடத்திவந்தார். தொடக்கத்திலேயே வனத் துறையினர் அவரை பிடிக்காமல் விட்டதால், வீரப்பன் அனைவருக்கும் சிம்மசொப்பனமாக மாறினார்.

2004 இல் வீரப்பன் சுட்டுக் கொல்லப்பட்ட நிலையில், இப்பகுதியில் சந்தன மரங்கள் வெட்டிக் கடத்தப்படுவதும், யானைகளைக் கொன்று தந்தங்களைக் கடத்துவதும் வெகுவாக குறைந்தது. இந்நிலையில், மீண்டும் இப்பகுதியில் யானை வேட்டையாடப்படுவது அதிகரித்துள்ளது.