1,100 அரசு பள்ளிகளில் மாணவர்களுக்கு கல்வி உபகரணங்கள்

அமைச்சர், எம்.பி. வழங்கினார்

- 

நாமக்கல், ஜூன் 2: நாமக்கல் மாவட்டத்தில் 1,100 அரசு மற்றும் அரசு உதவிபெறும் பள்ளிகளில் பயிலும் மாணவ, மாணவிகளுக்கு பல்வேறு வகையான கல்வி உபகரணங்களை தமிழக ஆதிதிராவிடர் நலத்துறை அமைச்சர் மா.மதிவேந்தன், மாநிலங்களவை உறுப்பினர் கே.ஆர்.என்.ராஜேஸ்குமார் ஆகியோர் திங்கள்கிழமை வழங்கினர்.

தமிழக பள்ளிக் கல்வித்துறை சார்பில், 2025-26-ஆம் கல்வியாண்டிற்கான புதிய பாடநூல்கள், சீருடைகள், நோட்டுப் புத்தகங்கள் மற்றும் பிற கல்வி உபகரணப் பொருள்களை அரசு மற்றும் அரசு உதவிபெறும் பள்ளிகளில் பயிலும் மாணவ, மாணவிகளுக்கு வழங்கும் நிகழ்வை சென்னையில் முதல்வர் மு.க.ஸ்டாலின் திங்கள்கிழமை தொடங்கி வைத்தார்.

இதைத் தொடர்ந்து, ராசிபுரம் அண்ணாசாலை அரசு மேல்நிலைப் பள்ளியில் நடைபெற்ற விழாவில், ஆதிதிராவிடர் நலத்துறை அமைச்சர் மா.மதிவேந்தன், மாவட்ட ஆட்சியர் ச.உமா ஆகியோர் பங்கேற்று மாணவ, மாணவிகளுக்கு புத்தகம், நோட்டுகள் மற்றும் சீருடைகளை வழங்கினர்.

மேலும், ராசிபுரம் நகராட்சி அங்கன்வாடி மையத்தில் குழந்தைகளுக்கு சீருடைகளை வழங்கினர்.