ஜோகோவிச் - அல்கராஸ் பெகுலா - சபலென்கா

டென்னிஸ் காலண்டரின் கடைசி கிராண்ட்ஸ்லாம் போட்டியான யுஎஸ் ஓபனில், முன்னிலை வீரர்களான செர்பியாவின் நோவக் ஜோகோவிச், ஸ்பெயினின் கார்லோஸ் அல்கராஸ் பலப்பரீட்சை நடத்தவுள்ளனர்.

- 

நியூயார்க், செப். 3: டென்னிஸ் காலண்டரின் கடைசி கிராண்ட்ஸ்லாம் போட்டியான யுஎஸ் ஓபனில், முன்னிலை வீரர்களான செர்பியாவின் நோவக் ஜோகோவிச், ஸ்பெயினின் கார்லோஸ் அல்கராஸ் பலப்பரீட்சை நடத்தவுள்ளனர். இப்போட்டியில் இவர்கள் நேருக்கு நேர் மோதுவது இதுவே முதல்முறையாகும்.

ஆடவர் ஒற்றையர் காலிறுதியில், 4 முறை யுஎஸ் ஓபன் சாம்பியனான ஜோகோவிச் 6-3, 7-5, 3-6, 6-4 என்ற செட்களில், உலகின் 4-ஆம் நிலை வீரரான அமெரிக்காவின் டெய்லர் ஃப்ரிட்ஸை வீழ்த்தினார். இதையடுத்து ஆடவர் ஒற்றையரில் உள்நாட்டு வீரர்கள் ஆட்டம் முடிவுக்கு வந்தது. ஃப்ரிட்ஸை 11-ஆவது முறையாக சந்தித்த ஜோகோவிச், அனைத்திலும் வென்று ஆதிக்கம் செலுத்துகிறார்.