பாலியல் வன்கொடுமை வழக்குகளில் 168 பேருக்கு தண்டனை விதிப்பு

பாலியல் வன்கொடுமை வழக்குகளில், தென் மண்டல அளவில் கடந்த 6 மாதங்களில் 168 பேருக்கு தண்டனை விதிக்கப்பட்டது.

- 

மதுரை, ஆக. 12:

இதுகுறித்து தென் மண்டல ஐஜி அலுவலகம் வெளியிட்ட செய்திக் குறிப்பு: பாலியல் வன்கொடுமை குற்றங்களைத் தடுப்பதற்கு தென் மண்டல காவல் துறை சார்பில் கடுமையான நடவடிக்கை எடுக்கப்பட்டு வருகிறது.

2025 ஜனவரி 1 முதல் ஜூலை 31 வரை தென் மண்டலத்துக்குள்பட்ட பல்வேறு மாவட்டங்களில் மொத்தம் 153 போக்சோ வழக்குகளில் தண்டனைகள் விதிக்கப்பட்டன.

இந்த வழக்குகளில் பாலியல் வன்கொடுமை குற்றவாளிகள் 168 பேருக்கு தண்டனை விதிக்கப்பட்டது. இவற்றில், 122 வழக்குகள் குழந்தைகளுக்கு எதிராக நடைபெற்ற பாலியல் குற்றங்களுக்காக (காதல் விவகாரம் அல்லாத) பதிவு செய்யப்பட்ட வழக்குகள் ஆகும்.