முருங்கைப் பொடியின் மகத்துவம்...

முருங்கையை முக்கிய உணவாகப் பயன்படுத்தத் தொடங்குவதே உடல் ஆரோக்கியத்தின் மீது நாம் வைக்கும் முதல் அக்கறையாகும்.

- -ந. முத்துமணி

முருங்கைக் கீரையைப் பொடியாக்கி இட்லி, தோசை, சப்பாத்தி போன்ற உணவில் கலந்து சாப்பிடலாம். தினமும் உட்கொள்வதால் எவ்விதத் தொந்தரவும் இல்லை. ஊட்டச்சத்து குறைபாடு இல்லாத, வலிமையான இளம் தலைமுறைக்கு முருங்கை மிக மிக முக்கியமான உணவாகும்'' என்கிறார் பசையா ஹிரேமத்.

அமெரிக்கா உள்ளிட்ட பல நாடுகளில் 24 ஆண்டுகள் தகவல்தொழில்நுட்பராக இவர் பணியாற்றி, கர்நாடகத்தில் கொப்பள் மாவட்டத்தில் உள்ள தனது சொந்த ஊருக்குத் திரும்பிய நிலையில் இயற்கை முறையில் முருங்கை மரங்களைப் பயிரிட்டு வருகிறார். முருங்கைப் பொடியைத் தயாரித்து வெளிநாடுகளுக்கு ஏற்றுமதி செய்கிறார். இவற்றை கொப்பள், ராய்ச்சூர், பாகல்கோட் போன்ற மாவட்டங்களில் அங்கன்வாடியில் பயிலும் குழந்தைகளின் ஊட்டச்சத்து குறைபாட்டைப் போக்க 'ஊட்டச்சத்து வேள்வி'யை நடத்தி, மத்திய, மாநில அரசுகளின் பாராட்டைப் பெற்றிருக்கிறார்.

தனது நீண்ட நெடிய பயணம் குறித்து பசையா ஹிரேமத் கூறியது:

''கொப்பளில் உள்ள கங்காவதி அருகேயுள்ள பூத்தகும்பா கிராமத்தில் சாதாரணக் குடும்பத்தில் பிறந்தேன். தகவல் தொழில்நுட்பப் பாடத்தில் கலபுர்கியில் டிப்ளமோவும் பெங்களூரில் பி.எஸ்.சி.யும் படித்தேன். பி.இ.எல்., டி.ஆர்.டி.ஓ. போன்ற மத்திய அரசு நிறுவனங்களில் பயிற்சி பெற்றேன்.