திருச்செந்தூர் கோயிலில் குடமுழுக்கு விழா கோலாகலம்

அலைகடலென பக்தர்கள் திரண்டு தரிசனம்

- 

திருச்செந்தூர், ஜூலை 7: முருகப்பெருமானின் இரண்டாம் படை வீடான திருச்செந்தூர் அருள்மிகு சுப்பிரமணிய சுவாமி கோயிலில் குடமுழுக்கு விழா திங்கள்கிழமை கோலாகலமாக நடைபெற்றது. இதில் லட்சக்கணக்கான பக்தர்கள் பங்கேற்றனர். குடமுழுக்கைத் தொடர்ந்து, சுவாமி சண்முகர் தங்க சப்பரத்தில் வள்ளி-தேவசேனா அம்மனுடன் வீதியுலா வந்தார்.

இந்தக் கோயிலில் 15 ஆண்டுகளுக்குப் பிறகு திங்கள்கிழமை குடமுழுக்கு விழா நடைபெற்றது. இதையொட்டி கடந்த ஜூலை 1-ஆம் தேதி, மூலவரான சுப்பிரமணிய சுவாமிக்கு கோயில் உள்ளே பிரகாரங்களில் 4 இடங்களிலும், உற்சவரான சுவாமி சண்முகருக்கு ராஜகோபுரம் அருகேயும் பிரம்மாண்டமாக யாகசாலைகள் அமைக்கப்பட்டிருந்தன. ராஜகோபுர வாசல் யாகசாலையில் சுவாமி சண்முகருக்கு 49, ஜெயந்திநாதர், நடராஜர், பெருமாள் தலா 5, பரிவார மூர்த்திகளுக்கு 12 என மொத்தம் 76 குண்டங்களில் சுமார் 400 கும்பங்கள் வைக்கப்பட்டு, 6 நாட்கள் பூஜைகள் நடைபெற்றன.