நிதி வழங்காமல் தமிழகத்தை வஞ்சிக்கிறது மத்திய அரசு

தமிழகத்துக்கு நிதி வழங்காமல் மத்திய அரசு வஞ்சித்து வருகிறது என்று குற்றஞ்சாட்டினார் திமுக துணைப் பொதுச்செயலர் கனிமொழி எம்.பி.

- கனிமொழி எம்.பி.

திருநெல்வேலி, ஜூன் 29:

திருநெல்வேலி மத்திய மாவட்ட திமுக சார்பில் பாளையங்கோட்டை கே.டி.சி. நகரில் ஞாயிற்றுக்கிழமை நடைபெற்ற திமுக பாக முகவர்கள் ஆலோசனைக் கூட்டத்தில் கனிமொழி பேசியதாவது:

நாம் எத்தனையோ தேர்தல்களைச் சந்தித்துள்ளோம். ஆனால், வரும் தேர்தல் மிகவும் வித்தியாசமான தேர்தல். ஏனென்றால் திமுகவின் கொள்கை, மொழியை நிலைநிறுத்தவும், உரிமைகளை மீட்டெடுக்கவும் உதவும் தேர்தல்.

நம் மொழியை ஒழிக்கவும், உரிமையைப் பறிக்கவும், வரலாற்றை மறைத்து விடவும் பாஜக முயன்று வருகிறது. தமிழகத்துக்கு நிதி வழங்காமல் புறக்கணித்து எல்லா விதத்திலும் மத்திய அரசு இடையூறு அளித்து வருகிறது.

பாஜக ஆளாத தமிழகம் உள்பட பல்வேறு மாநிலங்களையும் மத்திய அரசு வஞ்சித்து வருகிறது. மத்திய அரசு நிதி தராவிட்டாலும், மக்களுக்கு அளித்த உறுதியின்படி பல்வேறு திட்டங்களை முதல்வர் மு.க.ஸ்டாலின் செயல்படுத்தி வருகிறார்.