விலைப்புள்ளி கோராமல் ரூ. 2 லட்சம் வரை அறிவியல் உபகரணங்கள் கொள்முதல்

பாதுகாப்பு துறை சார்ந்த ஆராய்ச்சி உள்பட பல்வேறு அறிவியல் ஆராய்ச்சிகளில் ஈடுபட்டு வரும் உயர் கல்வி நிறுவனங்களில் ஆராய்ச்சியை ஊக்குவிக்கும் வகையில் விலைப்புள்ளிகள் கோராமல் அறிவியல் உபகரணங்கள் வாங்குவதற்கான நிதி உச்சவரம்பை உயர்த்தி மத்திய அரசு நடவடிக்கை மேற்கொண்டுள்ளது.

- 

புது தில்லி, ஜூன் 7:

இதற்கென பொது நிதி விதிகளில் (ஜிஎஃப்ஆர்) உள்ள சிறப்பு வழிமுறைகளில் மத்திய அரசு திருத்தங்களை மேற்கொண்டுள்ளது.

அதன்படி, உயர் கல்வி நிறுவனங்கள் விலைப்புள்ளிகள் கோராமல் அறிவியல் உபகரணங்களை வாங்குவதற்கான உச்ச வரம்பு ரூ. 1 லட்சத்திலிருந்து ரூ. 2 லட்சமாக அதிகரிக்கப்பட்டுள்ளது. இதன் மூலம், பல்கலைக்கழக துணைவேந்தர்கள் மற்றும் பல்வேறு ஆராய்ச்சி நிறுவனங்களின் இயக்குநர்களும் எந்தவித விலைப்புள்ளிகளும் கோராமல் ரூ. 2 லட்சம் வரை அறிவியல் உபகரணங்களை வாங்க முடியும்.

அதுபோல, உயர்கல்வி நிறுவன கொள்முதல் குழு கல்வி நிறுவனத்துக்குத் தேவையான பொருள்களை வாங்குவதற்கான நிதி உச்சவரம்பு தற்போதுள்ள ரூ. 10 லட்சத்தில் இருந்து ரூ. 25 லட்சமாக உயர்த்தப்பட்டுள்ளது.