நேபாள இடைக்கால பிரதமராக சுசீலா கார்கி பொறுப்பேற்பு

நேபாளத்தின் இடைக்காலப் பிரதமராக (இடைக்கால அரசின் தலைவர்) உச்சநீதிமன்ற முன்னாள் தலைமை நீதிபதி சுசீலா கார்கி வெள்ளிக்கிழமை நியமிக்கப்பட்டு, உடனடியாகப் பதவி ஏற்றுக் கொண்டார்.

- 

காத்மாண்டு, செப். 12:

நேபாள உச்சநீதிமன்றத்தின் முதல் பெண் தலைமை நீதிபதி என்ற சிறப்புக்குரிய சுசீலா கார்கி (73), இப்போது நாட்டின் முதல் பெண் பிரதமர் என்ற புதிய வரலாற்றையும் படைத்துள்ளார். அவரது பதவியேற்பின் மூலம் நேபாளத்தில் கடந்த சில நாள்களாக நீடித்த அரசியல் குழப்பம் முடிவுக்கு வந்துள்ளது.

அண்டை நாடான நேபாளத்தில் ஆட்சியாளர்களின் ஊழல் மற்றும் சமூக ஊடகங்களுக்கு விதிக்கப்பட்ட தடைக்கு எதிராக இளைஞர்கள் கிளர்ந்தெழுந்து, கடந்த திங்கள்கிழமை பெரும் போராட்டத்தில் ஈடுபட்டனர். அப்போது, காவல் துறையினரால் 19 பேர் சுட்டுக் கொல்லப்பட்டதால், போராட்டம் மேலும் தீவிரமடைந்து, பெரும் வன்முறை வெடித்தது.

நாடாளுமன்றம், உச்சநீதிமன்றம், அதிபர், பிரதமர், அமைச்சர்களின் வீடுகள், அரசுக் கட்டடங்கள் மற்றும் காவல் நிலையங்கள் சூறையாடப்பட்டு, தீக்கிரையாக்கப்பட்டன. ஆட்சி அதிகாரத்தில் இருந்தவர்கள் தெருவில் ஓட ஓட தாக்கப்பட்ட காட்சிகள், அரசியல் வட்டாரத்தில் பெரும் அதிர்வலைகளை ஏற்படுத்தின.