தஞ்சாவூர் மாவட்டத்தில் சாதனை இலக்கை நோக்கி நெல் கொள்முதல்

தஞ்சாவூர் மாவட்டத்தில் நிகழ் காரீஃப் ஆண்டில் (2024, செப்டம்பர் - 2025, ஆகஸ்ட்) இதுவரை 10.36 லட்சம் டன் நெல் கொள்முதல் செய்யப்பட்டு, சாதனை இலக்கை நோக்கிச் செல்கிறது.

- நமது நிருபர்

தஞ்சாவூர், ஆக. 28:

மேட்டூர் அணை உரிய காலத்தில் திறக்கப்பட்டு, தொடர்ந்து தண்ணீர் வந்தாலும் தஞ்சாவூர் மாவட்டத்தில் முன்பெல்லாம் ஓராண்டில் அதிகபட்சமாக ஏறக்குறைய 6 லட்சம் டன்தான் நெல் கொள்முதல் செய்யப்பட்டு வந்தது. இந்நிலையில், 2020-ஆம் ஆண்டில் மேட்டூர் அணை உரிய காலத்தில் திறக்கப்பட்ட நிலையில், மாவட்டத்தில் 2020 - 21 காரீஃப் ஆண்டில் நெல் கொள்முதல் 10.54 லட்சம் டன்னை எட்டியது. இதுவே, மாவட்டத்தில் நெல் கொள்முதலில் சாதனை அளவாக இருந்து வருகிறது.

இதைத்தொடர்ந்து, 2021 - 22 ஆம் ஆண்டில் ஏறத்தாழ 9.48 லட்சம் டன்னும், 2022 - 2023 ஆம் ஆண்டில் 9.73 லட்சம் டன்னும் நெல் கொள்முதல் செய்யப்பட்டது. ஆனால், 2023 - 24 ஆம் ஆண்டில் மேட்டூர் அணையில் நீர் இருப்பு இல்லாததால், காவிரி நீர் வரத்து அக்டோபர் மாதத்தில் நின்றது. இதேபோல, எதிர்பார்த்த அளவுக்கு மழை பெய்யாததால், மகசூல் வீழ்ச்சியடைந்து, நெல் கொள்முதல் 7.89 லட்சம் டன்னாக குறைந்தது.