வாடகைக் கட்டடத்தில் செயல்படும் சேரர் அகழ்வாய்ப்பகம்

கரூரில் போதிய இடவசதியின்றி, வீடு போன்ற வாடகைக் கட்டடத்தில் செயல்பட்டு வரும், தொன்மையை பறைசாற்றும் சேரர் அகழ்வாய்ப்பகத்தை உரிய வசதிகளுடன் கூடிய அரசு கட்டடத்துக்கு மாற்ற வேண்டும் என வரலாற்று ஆய்வாளர்களும், சமூக ஆர்வலர்களும் எதிர்பார்க்கின்றனர்.

- நமது நிருபர்

கரூர், ஆக. 24:

கரூர் எனும் வஞ்சி மாநகரை சங்க கால சேர மன்னன் கோஅதன் செல்லிரும்பொறை ஆட்சி செய்தது கரூர் புகழிமலையிலுள்ள கல்வெட்டுகள் மூலம் அறிய முடிகிறது. இந்த கல்வெட்டுகளில் சேர மன்னன் செல்லிரும்பொறையின் மகன் பெருங்கடுங்கோனின் பட்டாபிஷேகத்துக்கு சமண முனிவர்கள் கரூர் புகழிமலையில் வந்து தங்கிய சமணர் படுக்கை கரூரின் தொன்மைக்கும், வரலாற்றுக்கும் இன்றும் சாட்சியாக உள்ளது.

மேலும், கரூர் நகரில் பாய்ந்து ஓடும் ஆம்பிராவதி எனும் அமராவதி நதியில் கிடைக்கப் பெற்ற ரோமானிய நாணயங்கள் அக்காலத்தில் ரோமானிய பேரரசுடன் கரூர் வாணிபத் தொடர்பில் இருந்ததையும் அறிய முடிகிறது. இதுபோன்ற எண்ணற்ற தகவல்களையும், கரூரின் பழைமையான வரலாற்றையும் இளம் தலைமுறையினர் அறிந்து கொள்ளும் வகையில், தொல்லியல் துறை சார்பில், கடந்த 1985-இல் கரூர் ஜவஹர் பஜாரில் மாரியம்மன் கோயில் அருகே கருவூர் சேரர் தொல்லியல் அகழ்வாய்ப்பகம் அமைக்கப்பட்டது.

பண்டைய காலத்தில் கரூர் மற்றும் புகழூர், காருடையாம்பாளையம், மண்மங்கலம், நத்தமேடு, முன்னூர் உள்ளிட்ட பல்வேறு பகுதிகளில் வசித்து வந்தவர்களுடன் தொடர்புடைய முதுமக்கள் தாழி மற்றும் ஈமச்சின்னங்களான கல்வட்டம், கல் குவை போன்றவை கண்டறியப்பட்டு ஆய்வு செய்து இந்த அகழ்வாய்ப்பகத்தில் காட்சிப்படுத்தப்பட்டுள்ளது.