ஆபரேஷன் சிந்தூர்: ஜூலை 28-இல் விவாதம்

பஹல்காம் பயங்கரவாதத் தாக்குதல் மற்றும் ஆபரேஷன் சிந்தூர் நடவடிக்கை தொடர்பாக மக்களவையில் ஜூலை 28-ஆம் தேதியும், மாநிலங்களவையில் ஜூலை 29-ஆம் தேதியும் விவாதம் நடைபெறவுள்ளது.

- 

புது தில்லி, ஜூலை 23:

மத்திய அரசிடம் சரமாரியாக கேள்வி எழுப்பி நெருக்கடி தர எதிர்க்கட்சிகளும், உரிய பதிலடி கொடுக்க ஆளும் தரப்பும் தயாராகி வருவதால் நாடாளுமன்றத்தின் அடுத்த வார அமர்வுகளில் அனல் பறக்கும் என்று எதிர்பார்க்கப்படுகிறது.

மக்களவையில் 16 மணி நேர விவாதத்துக்கு மத்திய அரசு ஏற்கெனவே ஒப்புக்கொண்ட நிலையில், மாநிலங்களவையிலும் அதே கால அளவிலான விவாதத்துக்கு புதன்கிழமை ஒப்புக்கொள்ளப்பட்டது.

இந்த விவாதத்துக்கு பிரதமர் மோடி பதிலளிக்க வேண்டும் என்ற எதிர்க்கட்சிகளின் கோரிக்கை மீது அரசுத் தரப்பில் இதுவரை உறுதிமொழி எதுவும் அளிக்கப்படவில்லை.

இந்த விஷயத்தில் இன்னும் முடிவெடுக்கப்படவில்லை என்று பாஜக வட்டாரங்கள் தெரிவித்தன.

நாடாளுமன்ற மழைக்கால கூட்டத் தொடர் கடந்த திங்கள்கிழமை தொடங்கிய நிலையில், ஆபரேஷன் சிந்தூர் நடவடிக்கை குறித்து உடனடி விவாதம் கோரி இரு அவைகளிலும் எதிர்க்கட்சிகள் அமளியில் ஈடுபட்டன.

இதையடுத்து, மக்களவையில் 16 மணி நேர விவாதத்துக்கு மத்திய அரசு ஒப்புக்கொண்டது.

அதன்படி, அடுத்த வாரம் திங்கள்கிழமை (ஜூலை 28) விவாதம் தொடங்கும் என்று எதிர்பார்க்கப்படுகிறது.

கூட்டத்துக்குப் பின் மாநிலங்களவை காங்கிரஸ் குழு துணைத் தலைவர் பிரமோத் திவாரி செய்தியாளர்களிடம் கூறுகையில், மாநிலங்களவை விவாதத்தின்போது, ஆபரேஷன் சிந்தூர் அல்லது பஹல்காம் தாக்குதல் தொடர்பாக எந்தத் தீர்மானமும் கொண்டு வரக் கூடாது; அவையில் பிரதமர் மோடி கட்டாயம் இருக்க வேண்டும் என்று காங்கிரஸ் சார்பில் வலியுறுத்தப்பட்டுள்ளது' என்றார்.