இயல்பு நிலைக்கு திரும்பும் பஹல்காம்: சுற்றுலாப் பயணிகள் வருகையால் உள்ளூர்வாசிகள் உற்சாகம்

பயங்கரவாத தாக்குதலில் 26 பேர் கொல்லப்பட்ட சம்பவத்தைத் தொடர்ந்து நிலவிய பதற்றமான சூழ்நிலைக்குப் பின்னர், பஹல்காமில் சுற்றுலா மீண்டும் இயல்புநிலைக்கு திரும்பத் தொடங்கியுள்ளது.

- 

பஹல்காம், ஜூன் 15:

தெற்கு காஷ்மீரில் அமைந்துள்ள இந்த நகரத்துக்கு, பக்ரீத் பண்டிகையைத் தொடர்ந்து பிராந்திய மக்கள் மற்றும் பஞ்சாப் மாநிலத்தைச் சேர்ந்த சுற்றுலாப் பயணிகள் ஏராளமானோர் கடந்த சில நாள்கள் வருகை தந்தனர். இதனால், சுற்றுலா துறையில் ஈடுபட்டுள்ள உள்ளூர் மக்கள் உற்சாகமடைந்துள்ளனர்.

பஹல்காம் அருகேயுள்ள பைசாரன் பள்ளத்தாக்கில் பாகிஸ்தானைச் சேர்ந்த பயங்கரவாதிகள் கடந்த ஏப். 22-ஆம் தேதி நடத்திய துப்பாக்கிச் சூடு தாக்குதலில் சுற்றுலாப் பயணிகள் உள்பட 26 பேர் கொல்லப்பட்டனர்.

இதற்கு பதிலடியாக ஆபரேஷன் சிந்தூர் நடவடிக்கையில் பாகிஸ்தானில் பயங்கரவாத உள்கட்டமைப்புகளை இந்திய ஏவுகணைகளை வீசி அழித்தது. தொடர்ந்து, இந்தியா-பாகிஸ்தான் எல்லையில் சண்டை ஏற்பட்டு, 4 நாள்கள் மோதலுக்குப் பிறகு அமைதி திரும்பியது.