நாடாளுமன்றம் நான்காவது நாளாக முடக்கம்

பிகாரில் மேற்கொள்ளப்படும் வாக்காளர் பட்டியல் தீவிர திருத்தப் பணியை திரும்பப் பெற வலியுறுத்தி எதிர்க்கட்சிகள் அமளியில் ஈடுபட்டதால் நாடாளுமன்றத்தின் இரு அவைகளும் வியாழக்கிழமை நான்காவது நாளாக முடங்கின.

- 

புதுதில்லி, ஜூலை 24:

மக்களவையில் எதிர்க்கட்சி உறுப்பினர்கள் பதாகைகளை ஏந்தி அவையின் மையப் பகுதிக்கு வந்து அமளியில் ஈடுபட்டனர்.

அப்போது காங்கிரஸ் மூத்த தலைவர் கே.சி. வேணுகோபால் பெயரைக் குறிப்பிட்டு, அவையில் கோஷம் எழுப்புவது, கூச்சலில் ஈடுபடுவது உங்கள் கட்சியின் கலாசாரம் அல்ல என்று மக்களவைத் தலைவர் ஓம் பிர்லா கூறினார்.

அமளி நீடித்ததால் மக்களவை தொடங்கிய 7 நிமிடங்களில் பிற்பகல் 2 மணி வரை ஒத்திவைக்கப்பட்டது. பின்னர் அவை கூடியபோதும் அமளி நீடித்ததால் நாள் முழுவதும் ஒத்திவைக்கப்பட்டது.