அன்புமணி நடைப்பயணம்: ராமதாஸ் எதிர்ப்பு

காவல் துறையில் மனு

- 

விழுப்புரம், ஜூலை 24: அன்புமணியின் 'உரிமை மீட்பு நடைப்பயணத்தால் வட மாவட்டங்களில் சட்டம் - ஒழுங்கு பிரச்னை ஏற்படும் என்பதால், அவரது நடைப்பயணத்துக்கு தடை விதிக்க தமிழக காவல் துறையிடம் மனு அளித்துள்ளதாக பாமக நிறுவனர் ச.ராமதாஸ் தெரிவித்தார்.

விழுப்புரம் மாவட்டம், திண்டிவனத்தை அடுத்த தைலாபுரம் தோட்டத்தில் உள்ள பாமக தலைமை அலுவலகத்தில் ராமதாஸ் வியாழக்கிழமை செய்தியாளர்களுக்கு அளித்த பேட்டி:

சென்னையில் செயல்பட்ட பாமக தலைமை அலுவலகம் நிர்வாக வசதிக்காக விழுப்புரம் மாவட்டம், தைலாபுரத்துக்கு மாற்றப்பட்டு செயல்பட்டு வருகிறது.

சென்னை உள்ளிட்ட வேறு எங்கும் தலைமை அலுவலகம் இல்லை. இதை கட்சியின் நிர்வாகிகள், தொண்டர்கள் தெரிந்து கொள்ள வேண்டும்.

கட்சிப் பணிகளுக்கு தைலாபுரத்துக்கு மட்டுமே வர வேண்டும். கட்சியில் பொறுப்பில் உள்ளவர்கள் யாரேனும் சென்னையில் தலைமை அலுவலகம் வைத்து நடத்தினால், அவர்கள் மீது சட்ட ரீதியான நடவடிக்கை மேற்கொள்ளப்படும்.