மதவாத அமைப்புகளின் பிரித்தாளும் சூழ்ச்சியை மக்கள் புரிந்து கொள்ள வேண்டும்

தொல்.திருமாவளவன்

- 

மதுரை, மார்ச் 9: மதவாத அமைப்புகளின் பிரித்தாளும் சூழ்ச்சியை மக்கள் புரிந்து கொள்ள வேண்டும் என்று விடுதலைச் சிறுத்தைகள் கட்சியின் தலைவர் தொல்.திருமாவளவன் கூறினார்.

மத நல்லிணக்க மக்கள் கூட்டமைப்பின் சார்பில், மதுரையில் மத நல்லிணக்க மாநாடு கிருஷ்ணய்யர் அரங்கில் ஞாயிற்றுக்கிழமை நடைபெற்றது. மாநாட்டுக்கு வழக்குரைஞர் வாஞ்சிநாதன் தலைமை வகித்தார்.

மாநாட்டில் விடுதலைச் சிறுத்தைகள் கட்சியின் தலைவரும் மக்களவை உறுப்பினருமான தொல்.திருமாவளவன் பேசியதாவது:

மத நல்லிணக்க மாநாட்டை மதுரையில் நடத்தக் கூடாது என்று காவல் துறை, வருவாய்த் துறை தடுத்தது அதிர்ச்சி அளிக்கிறது. தமிழக முதல்வர் மதவாத சக்திகளை எதிர்த்துப் போராடி வருகிறார். இதில் எவ்வித மாற்றுக் கருத்தும் இல்லை. ஆனால், மதுரை மாநகரக் காவல் துறை, மாவட்ட நிர்வாகம் மத நல்லிணக்க அமைப்புகளுக்கு தொடர்ந்து அனுமதி மறுப்பது கண்டிக்கத்தக்கது.

ஒவ்வொருவருக்கும் அவரவர் மதத்தின் மீது நம்பிக்கை உண்டு. அந்த நம்பிக்கையில் யாரும் தலை யிடக் கூடாது. இந்த நடைமுறையை அனைவரும் பின்பற்றினால் மத நல்லிணக்கம் துளிர்க்கும். ஹிந்து மத நம்பிக்கை வேறு, ஹிந்து மத நம்பிக்கையைப் பயன்படுத்தி அரசியல் செய்வது வேறு.

மதத்தை கையில் எடுத்து அதற்கு எதிரான அரசியலை விதைப்பதால்தான் பிரச்னை எழுகிறது. இந்தச் சூழ்ச்சியை ஹிந்து மதப் பற்றாளர்கள், குருக்கள், மதத்தைச் சார்ந்தவர்கள் நன்றாகப் புரிந்து கொள்ள வேண்டும்.