சீறிப் பாய்ந்த சிராஜ்; இந்தியா 'த்ரில்' வெற்றி; தொடர் சமன்

இங்கிலாந்துக்கு எதிரான 5-ஆவது டெஸ்ட் கிரிக்கெட்டின் கடைசி நாளில் இந்தியா 6 ரன்கள் வித்தியாசத்தில் திங்கள்கிழமை 'த்ரில்' வெற்றி பெற்றது.

- 

லண்டன், ஆக. 4:

பரபரப்பான 5-ஆவது நாள் ஆட்டத்தில் இங்கிலாந்தின் வெற்றிக்கு 35 ரன்களே தேவையிருந்த நிலையில், இந்தியா தனது வெற்றிக்குத் தேவையான 4 விக்கெட்டுகளை வீழ்த்தி அசத்தலாக வென்றது.

அதில் முகமது சிராஜ் 3 விக்கெட்டுகள் கைப்பற்றி முக்கியப் பங்காற்ற, பிரசித் கிருஷ்ணாவும் ஒரு விக்கெட் சாய்த்து உதவினார்.

இதன் மூலமாக 5 ஆட்டங்கள் கொண்ட தொடர் 2-2 என சமனில் முடிந்தது. ஒரு ஆட்டம் டிராவானது நினைவுகூரத்தக்கது. இந்தியாவின் வெற்றிக்கு முக்கியப் பங்காற்றிய முகமது சிராஜ் ஆட்டநாயகன் விருது (9 விக்கெட்) பெற, இந்திய கேப்டன் ஷுப்மன் கில் (754 ரன்கள்), இங்கிலாந்து பேட்டர் ஹேரி புரூக் (481 ரன்கள்) ஆகியோர் தொடர்நாயகன் விருதை பகிர்ந்து கொண்டனர்.

முன்னதாக, லண்டனில் உள்ள தி ஓவல் மைதானத்தில் இந்த கடைசி டெஸ்ட், கடந்த வியாழக்கிழமை தொடங்கியது. தொடரில் 2-1 என்ற முன்னிலையுடன் இங்கிலாந்து நெருக்கடியின்றி இந்த ஆட்டத்துக்கு வர, தொடரை சமன் செய்ய இதில் வென்றாக வேண்டிய கட்டாயத்தில் இந்தியா இருந்தது.