மும்பை ரயில் தொடர் குண்டுவெடிப்பு வழக்கு: உயர்நீதிமன்றத் தீர்ப்புக்கு உச்சநீதிமன்றம் இடைக்காலத் தடை

மகாராஷ்டிர மாநிலம் மும்பையில் 2006-இல் 180 பேர் உயிர் இழந்த ரயில் தொடர் குண்டுவெடிப்பு வழக்கில் போதிய ஆதாரங்கள் இல்லை எனக் கூறி 12 பேரை விடுதலை செய்த மும்பை உயர் நீதிமன்றத் தீர்ப்புக்கு உச்ச நீதிமன்றம் வியாழக்கிழமை இடைக்காலத் தடை விதித்தது.

- 

புது தில்லி, ஜூலை 24:

ஆனால் விடுதலை செய்யப்பட்ட 12 பேரையும் மீண்டும் சிறையில் அடைக்கத் தேவையில்லை எனவும் பிற வழக்குகளுக்கு முன்னோடியாக அமைந்துவிடக் கூடாது என்பதற்காக மும்பை உயர் நீதிமன்றத் தீர்ப்புக்கு மட்டும் இடைக்காலத் தடை விதிப்பதாகவும் உச்ச நீதிமன்றம் தெரிவித்தது.

முன்னதாக, இந்த வழக்கில் 12 பேரையும் குற்றவாளிகள் என 2015-இல் தீர்ப்பளித்த சிறப்பு நீதிமன்றம், அவர்களில் 5 பேருக்கு மரண தண்டனையும் 7 பேருக்கு வாழ்நாள் சிறைத் தண்டனையும் விதித்து உத்தரவிட்டது.

இந்த உத்தரவை அண்மையில் ரத்து செய்த மும்பை உயர் நீதிமன்றம், 'இவர்கள் தான் இந்த குற்றச் சம்பவத்தில் ஈடுபட்டனரா என்பதை நம்பும் வகையில் ஆதாரங்கள் இல்லை' எனத் தெரிவித்தது.