தனியாருக்கு நிகரான அரசு உடற்பயிற்சி நிலையங்கள்

மாத கட்டணமாக ரூ.1000 நிர்ணயிக்க திட்டம்

- எம்.மாரியப்பன்

நாமக்கல், ஜூலை 27: மாவட்ட விளையாட்டு மைதானங்களில் அமைக்கப்பட்டு வரும் உடற்பயிற்சி நிலையங்களில் பொதுமக்கள் உடற்பயிற்சி மேற்கொள்ள மாதம் (நாள்தோறும் ஒரு மணி நேரம்) ரூ. 1,000 கட்டணம் நிர்ணயிக்க முடிவு செய்துள்ளதாக தகவல் தெரியவந்துள்ளது.

தமிழ்நாடு விளையாட்டு மேம்பாட்டு ஆணையத்தின் கீழ் செயல்படும் விடுதிகளிலும், மாவட்ட விளையாட்டு அலுவலகங்கள் மற்றும் மைதானங்கள் உள்ள பகுதிகளிலும் ரூ. 40 லட்சம் மதிப்பீட்டில் உடற்பயிற்சி நிலையம் அமைக்கும் பணிகள் மாவட்ட வாரியாக நடைபெற்று வருகின்றன.

தற்போது தூத்துக்குடி, நாமக்கல் ஆகிய இரு மாவட்டங்களில் மட்டுமே இந்த உடற்பயிற்சி நிலையங்கள் திறக்கப்பட்டுள்ளன. மேலும் 36 மாவட்டங்களில் விரைந்து பணிகளை முடித்து திறப்பதற்கான ஏற்பாடுகள் நடைபெற்று வருகின்றன. துணை முதல்வரால் திறந்து வைக்கப்பட்ட அரசு உடற்பயிற்சி நிலையங்கள் இதுவரை பொதுமக்கள் பயன்பாட்டுக்கு திறக்கப்படவில்லை.