சீர் கொண்டு தழைக்கும் தமிழ்!

தமிழ்ப் பா வகைகளில் இயற்றுவதற்குக் கடினமானது வெண்பாவாகும்.

- முனைவர் கி.சிவா

தமிழ்ப் பா வகைகளில் இயற்றுவதற்குக் கடினமானது வெண்பாவாகும். அதனால்தான் எல்லாப் புலவர்களுக்கும் வெண்பா ‘புலி’ என ஒளவையார் குறிப்பிட்டுள்ளார். அதேநேரத்தில், வெண்பாவிற்கோர் புகழேந்தி என நளவெண்பாவைப் பாடிய புகழேந்திப்புலவர் சிறப்பிக்கப்பட்டுள்ளார். வெண்பாவை இயற்றுவதில் புலி போன்றவர் என்னும் பொருளுடைய வெண்பாப்புலிக் கவிராயர் என்றொரு புலவர் பெருமகனார் சிவகங்கைப் பகுதியில் வாழ்ந்துள்ளார்.

மகாவித்துவான் மீனாட்சி சுந்தரம்பிள்ளையவர்களிடம், உ.வே.சா.வுடன் உடன் பயின்றவர் வேலுச்சாமிப்பிள்ளை என்பார். அவர் பிற்காலத்தில் வெண்பா இயற்றுவதில் சிறந்து விளங்கினார். ஆகவே, மகாவித்துவான் அவருக்கு வெண்பாப்புலி என்று பட்டம் வழங்கிப் பாராட்டியுள்ளார். அவர் 5,665 வெண்பாக்களால் கந்தபுராண வெண்பா என்றொரு நூலைப் படைத்துள்ளார்.

அவ்வகையில், முத்தொள்ளாயிரமும் வெண்பாவின் சுவைதேர் இலக்கியமாகும். அதனை இயற்றியவர் பெயர் அறிய இயலவில்லை. அந்நூலை இரசிகமணி டி.கே.சி. கொண்டாடி மகிழ்ந்தார். அத்துடன் பதிப்பித்தும் கொடுத்தார்.