வளர்ச்சித் திட்டப்பணிகளை விரைந்து முடிக்க வேண்டும்

கடலூர் மாவட்டத்தில் ஊராட்சி ஒன்றியங்களில் மேற்கொள்ளப்பட்டு வரும் வளர்ச்சித் திட்டப்பணிகளை விரைந்து முடித்து மக்கள் பயன்பாட்டுக்குக் கொண்டு வர வேண்டும் என்று அதிகாரிகளுக்கு வேளாண்மைத் துறை அமைச்சர் எம்.ஆர்.கே. பன்னீர்செல்வம் அறிவுறுத்தினார்.

- 

சிதம்பரம், ஆக. 22:

கடலூர் மாவட்டம் சிதம்பரம் அருகே பரங்கிப்பேட்டை ஊராட்சி ஒன்றிய அலுவலகக் கூட்ட அரங்கில் பரங்கிப்பேட்டை, குமராட்சி, காட்டுமன்னார்கோயில், ஸ்ரீமுஷ்ணம், கீரப்பாளையம் ஆகிய ஊராட்சி ஒன்றியங்களில் மேற்கொள்ளப்பட்டு வரும் வளர்ச்சித் திட்டப்பணிகள் குறித்து அமைச்சர் எம்.ஆர்.கே. பன்னீர்செல்வம் வெள்ளிக்கிழமை அன்று ஆய்வு மேற்கொண்டார்.

ஆய்வுக் கூட்டத்திற்கு கடலூர் மாவட்ட ஆட்சியர் சிபி ஆதித்யா செந்தில்குமார் முன்னிலை வகித்தார். கூட்டத்தில் அமைச்சர் எம்.ஆர்.கே. பன்னீர்செல்வம் பேசியதாவது:

பரங்கிப்பேட்டை, குமராட்சி, காட்டுமன்னார்கோயில், ஸ்ரீமுஷ்ணம், கீரப்பாளையம் ஆகிய ஊராட்சி ஒன்றியங்களில் முதல்வரின் கிராம சாலைகள் மேம்பாட்டுத் திட்டத்தின் கீழ் தார் சாலை, மண் சாலை, சாலைப் பராமரிப்புப் பணிகள், விவசாய நிலங்கள் இணைப்புச் சாலை போன்ற 25 பணிகள் ரூ.1038 லட்சம் மதிப்பீட்டில் மேற்கொள்ளப்பட்டு வருகின்றன.

நபார்டு திட்டத்தின் கீழ் தார் சாலை, மண் சாலை, கிராம இணைப்புச் சாலைகள் போன்ற 15 பணிகள் ரூ.1387 லட்சம் மதிப்பீட்டில் மேற்கொள்ளப்படுவதில் 9 பணிகள் முடிக்கப்பட்டுள்ளன.