தொழிற்சங்கத்தினர் வேலைநிறுத்தம்: மேற்கு வங்கம், கேரளத்தில் இயல்பு வாழ்க்கை பாதிப்பு

மத்திய தொழிற்சங்கங்கள் கூட்டமைப்பின் அழைப்பின்பேரில் புதன்கிழமை நடைபெற்ற நாடு தழுவிய பொது வேலைநிறுத்தத்தால் மேற்கு வங்கம், கேரளம் ஆகிய மாநிலங்களில் இயல்பு வாழ்க்கை பாதிக்கப்பட்டது.

- 

கொல்கத்தா/திருவனந்தபுரம், ஜூலை 9:

பொதுத்துறை நிறுவனங்களைத் தனியார்மயமாக்கக்கூடாது; தொழிலாளர் நலன்களைப் பாதுகாக்க வேண்டும்; தொழிலாளர்களுக்கு எதிரான நான்கு சட்டங்களைத் திரும்பப் பெற வேண்டும்; பொதுத்துறை நிறுவனங்களில் காலிப் பணியிடங்களை நிரப்ப வேண்டும்; பழைய ஓய்வூதியத்திட்டத்தை மீண்டும் கொண்டுவருதல் உள்பட 17 அம்ச கோரிக்கைகளை வலியுறுத்தி நாடு தழுவிய பொது வேலைநிறுத்தம் புதன்கிழமை நடைபெற்றது.

பாஜக ஆளும் மாநிலங்களில் இந்த வேலைநிறுத்தம் பெரிய பாதிப்பை ஏற்படுத்தவில்லை. அரசு ஊழியர்கள், தொழிற்சங்கத்தினர் ஆர்ப்பாட்டம் மட்டுமே சில இடங்களில் நடந்தன. இடதுசாரிகள் அதிகமுள்ள மேற்கு வங்கம், கேரளத்தில் வேலைநிறுத்தம் பெரிய அளவில் நடைபெற்றது.