இந்தியாவை இணைக்கும் ரயில் பாதை!

காஷ்மீர் பள்ளத்தாக்கு மக்களின் நீண்ட கால கனவு செனாப் ரயில் பாலத்தின் மூலம் நனவாகியிருக்கிறது.

- 

காஷ்மீரை நாட்டின் இதர பகுதிகளுடன் ரயில் பாதை மூலம் இணைக்கும் திட்டம் வெற்றிகரமாக நிறைவேற்றப்பட்டு கடந்த 6-ஆம் தேதி பிரதமர் நரேந்திர மோடியால் நாட்டுக்கு அர்ப்பணிக்கப்பட்டிருக்கிறது.

உதம்பூர்-ஸ்ரீநகர்-பாரமுல்லா ரயில்பாதைத் திட்டத்தின் ஒருபகுதியாக ரியாசி மாவட்டத்தின் செனாப் நதியின் குறுக்கே எஃகால் (ஸ்டீல்) உருவாக்கப்பட்ட செனாப் ரயில் பாலம் இந்திய அளவிலும் சர்வதேச அளவிலும் கவனம் ஈர்த்துள்ளது. உலகின் மிக உயரமான ரயில் பாலமாகவும், பொறியியல் அதிசயங்களில் ஒன்றாகவும் இது கருதப்படுகிறது.

இந்தியாவின் இதர பகுதிகளில் இருந்து ஜம்மு-காஷ்மீர் மாநிலத்தில் உள்ள உதம்பூர் வரை மட்டுமே ரயில்கள் இயக்கப்பட்டு வந்தன. ஜம்முவிலிருந்து சுமார் 250 கி.மீ. தொலைவில் உள்ள ஸ்ரீநகருக்கு சாலை வழியாகச் சென்றடைய சுமார் 6 மணி நேரமாகும். தற்போது நிறைவேற்றப்பட்டிருக்கும் உதம்பூர்-ஸ்ரீநகர்-பாரமுல்லா ரயில்தடம் ஜம்முவுக்கும் ஸ்ரீநகருக்கும் இடையேயான பயண நேரத்தை பாதியாகக் குறைக்கிறது.