47% வளர்ச்சி கண்ட தென்னக நகரங்கள்

இந்தியாவின் எட்டு முக்கிய நகரங்களில் ஒட்டு மொத்த வீடுகள் விற்பனை சற்று சரிந்த போதிலும், ஹைதராபாத், பெங்களூரு, சென்னை ஆகிய மூன்று தென்னக நகரங்களில் ஜூலை-செப்டம்பர் காலாண்டில் வீடுகள் விற்பனை 47 சதவீதம் உயர்ந்துள்ளது.

- 

இது குறித்து சந்தை ஆலோசனை நிறுவனமான ப்ராப்டைக்கரின் தரவுகள் தெரிவிப்பதாவது: ஹைதராபாத், பெங்களூரு, சென்னை ஆகிய மூன்று முக்கிய தென்னக நகரங்களில் செப்டம்பர் காலாண்டில் வீடுகள் விற்பனை 38,644-ஆக உள்ளது. இது கடந்த ஆண்டின் இதே காலாண்டுடன் ஒப்பிடுகையில் 47 சதவீதம் அதிகம். அப்போது மூன்று தென்னக நகரங்களிலும் 26,284 வீடுகள் விற்பனையாகின.

மதிப்பீட்டுக் காலாண்டில் ஹைதராபாத்தில் வீடுகள் விற்பனை 53 சதவீதம் உயர்ந்து 17,658-ஆக உள்ளது. கடந்த ஆண்டின் இதே காலகட்டத்தில் இந்த எண்ணிக்கை 11,564-ஆக இருந்தது.