இந்திய உதவியுடன் இலங்கையில் ரயில்வே திட்டங்கள்: பிரதமர் மோடி தொடங்கி வைத்தார்

புகழ் பெற்ற பௌத்த கோயிலில் வழிபாடு

- 

கொழும்பு, ஏப். 6: இலங்கையின் அனுராதபுரத்தில் உள்ள புகழ்பெற்ற ஜெய ஸ்ரீ மகாபோதி பௌத்த கோயிலில் ஞாயிற்றுக்கிழமை வழிபட்ட பிரதமர் நரேந்திர மோடி, இந்திய நிதியுதவியுடன் மேற்கொள்ளப்பட்ட இரு ரயில்வே திட்டங்களையும் தொடங்கி வைத்தார்.

தாய்லாந்தில் இருந்து இலங்கைக்கு மூன்று நாட்கள் அரசுமுறைப் பயணமாக கடந்த வெள்ளிக்கிழமை வந்த பிரதமர் மோடி, கொழும்பில் அதிபர் அநுரகுமார திசாநாயகவுடன் சனிக்கிழமை இருதரப்பு பேச்சுவார்த்தை நடத்தினார். அப்போது, மீனவர் பிரச்னையில் மனிதாபிமான அணுகுமுறையைக் கையாள்வதுடன், இலங்கை சிறையில் உள்ள இந்திய மீனவர்களையும் அவர்களது படகுகளையும் உடனடியாக விடுவிக்க வேண்டுமென அதிபரிடம் பிரதமர் வலியுறுத்தினார். இலங்கை தமிழ் மக்களின் எதிர்பார்ப்புகளை அந்நாட்டு அரசு நிறைவேற்ற வேண்டுமென்ற இந்தியாவின் எதிர்பார்ப்பையும் அவர் முன்வைத்தார்.

இரு நாடுகளுக்கும் இடையே பாதுகாப்புத் துறை ஒத்துழைப்பை 35 ஆண்டுகளுக்குப் பின் வலுப்படுத்தும் முக்கிய ஒப்பந்தம் உள்பட 7 ஒப்பந்தங்கள் கையொப்பமாகின. இந்திய நிதியுதவியுடன் நிறைவேற்றப்பட்ட பல்வேறு திட்டங்கள் காணொலி வாயிலாக தொடங்கிவைக்கப்பட்டன.